Qazaqstan Saýd Arabııasyna QazVac vaktsınasyn jetkizýdi usyndy

NUR-SULTAN. QazAqparat – Qazaqstan Saýd Arabııasyna QazVac vaktsınasyn jetkizý múmkindigin qarastyrýdy usyndy. Bul týraly QR Saýda jáne ıntegratsııa mınıstri Baqyt Sultanov aıtty, dep habarlaıdy QazAqparat tilshisi.

Buǵan deıin mınıstr Qazaqstan men Saýd Arabııasynyń tikeleı áýe reısteri qaıta jandanatynyn habarlaǵan edi.

«Qozǵalys shekteýlerin azaıtý úshin biz vaktsınalaý pasporttaryn ekijaqty tanýdy qoldaımyz. Eger Saýd Arabııasy tarapy qyzyǵýshylyq tanytsa, Qazaqstan QazVac vaktsınasyn Saýd Arabııasyna jetkizý, sondaı-aq Saýd Arabııasy Koroldigi aýmaǵynda qazaqstandyq vaktsınany birlesip óndirý múmkindigin qarastyrýdy usynady», - dedi Baqyt Sultanov elordada Qazaqstan men Saýd Arabııasynyń birlesken ınvestıtsııalyq bıznes forýmynda.

Aıta keteıik, Qazaqstan-Saýd Arabııasy ınvestıtsııalyq bıznes-forýmyna eki eldiń isker toptary men bıznesiniń 170-ten astam ókili qatysýda. Shara barysynda saýdııalyq kompanııalar jeke sektordy damytý, serpindi qoǵam qurý jáne Koroldiktiń halyqaralyq saýdadaǵy básekege qabilettigin arttyrýdy kózdeıtin «Saudi Vision 2030» ulttyq baǵdarlamasyn iske asyrý tájirıbesimen bólisedi.