Qazaqstan Saýd Arabııasy men Iran arasyndaǵy dıplomatııalyq ýaǵdalastyqtardy quptaıdy - SІM

ASTANA. QazAqparat - Qazaqstan 10 naýryzda Beıjiń qalasyndaǵy Saýd Arabııasy Koroldigi men Iran Islam Respýblıkasy arasyndaǵy dıplomatııalyq qatynastardy qalpyna keltirý týraly ýaǵdalastyqtardy quptaıdy. Bul týraly QazAqparat SІM silteme jasap habarlaıdy.

«Biz Qytaı Halyq Respýblıkasynyń kelissózder úderisindegi jáne tabysty nátıjelerge qol jetkizýdegi rólin joǵary baǵalaımyz. Bul ýaǵdalastyqtar 2016 jyly sáýirde Ystanbulda ótken Islam yntymaqtastyǵy uıymynyń XIII sammıtinde usynylǵan Qazaqstannyń Islamdyq tatýlasý jónindegi bastamasyna tolyǵymen sáıkes keledi. Saýd Arabııasy men Iran arasyndaǵy dıplomatııalyq qatynastardy qalpyna keltirý jáne ózara elshilikterin ashýlary óńirlik jáne jahandyq qaýipsizdik pen turaqtylyqty nyǵaıtýǵa yqpal etetinine senimdimiz»,- delingen mınıstrliktiń málimdemesinde.

Buǵan deıin habarlaǵanymyzdaı, Iran men Saýd Arabııasy qarym-qatynasyn qalpyna keltiretin bolyp kelisti.