Qazaqstan Saýd Arabııasyndaǵy hýsıtterdiń shabýyldaryn qatań aıyptady
ASTANA. KAZINFORM — Qazaqstan Respýblıkasynyń Syrtqy ister mınıstrligi hýsıt jasaqtarynyń Saýd Arabııasyndaǵy azamattyq ınfraqurylym nysandaryna jasaǵan, adam shyǵynyna ákep soqqan shabýyldaryn qatań aıyptady.
Vedomstvonyń málimdeýinshe, mundaı shabýyldarǵa gýmanıtarlyq turǵydan jol berýge bolmaıdy jáne olar halyqaralyq quqyq normalaryn buzady.
Mınıstrlik bul áreketter Iemendegi ahýaldy turaqtandyrý jónindegi kúsh-jigerge nuqsan keltirip, qaqtyǵysty saıası jolmen retteýge kedergi keltiretinin atap ótti.
— Shabýyldardy dereý toqtatýǵa jáne daǵdarysty tek saıası-dıplomatııalyq quraldar arqyly sheshýge shaqyramyz, — delingen málimdemede.
Sondaı-aq Qazaqstan Saýd Arabııasymen yntymaqtastyǵyn rastap, Koroldiktiń BUU Jarǵysyna sáıkes óz egemendigi men qaýipsizdigin qorǵaýǵa quqyly ekenin málimdedi.
Eske salaıyq, buǵan deıin Qazaqstan Syrtqy ister mınıstrligi hýsıtterdiń Er-Rııad áýejaıyna jasaǵan shabýylynan keıin zardap shekkender arasynda el azamattarynyń bar-joǵyn tekserip jatqany habarlanǵanbyz.
Aldyn ala málimet boıynsha, qaza tapqandar men jaralanǵandardyń arasynda Qazaqstan azamattary joq.
