Qazaqstan Saýd Arabııasymen ınnovatsııalyq hab ashpaq

Qazaqstan Saýd Arabııasynyń astanasy Er-Rııadta startaptarǵa arnalǵan ınnovatsııalyq hab ashady. Bul týraly QR Tsıfrlyq damý, ınnovatsııa jáne aeroǵarysh ónerkásibi vıtse-mınıstri Qanysh Tóleýshın Qazaqstan men Saýd Arabııasy arasynda úkimetaralyq komıssııa otyrysy kezinde málim etti, dep habarlaıdy Kazinform tilshisi.

Vıtse-mınıstrdiń aıtýynsha, Qazaqstan ortaq ınnovatsııalyq hab qurý bastamasyn kóterdi. Ol otandyq startapshylar men tehnologııalyq komanııalarǵa Saýd Arabııasynda ǵana emes, Taıaý Shyǵys, Soltústik Afrıkada keńsesin ashyp, shekarasyn keńeıtýge múmkindik beredi.

— Sol naryqta startaptarymyzdy damytý boıynsha akseleratsııalyq baǵdarlamalarmen qatar, operatsııalyq múmkindikterin keńeıtý úshin ınvestıtsııalyq kapıtal tartý múmkindigi ashylady. Qýanyshymyzǵa oraı, jasandy ıntellekt salasyndaǵy kóptegen kompanııalarymyz Saýd Arabııasynda jumys istep jatyr. Medıtsınalyq tehnologııalarmen aınalysatyn kompanııalar da bar, - dedi Qanysh Tóleýshın.

Innovatsııalyq hab 2024 jylǵy qańtarda jumysyn bastaıdy. Hab qurýda Saýd Arabııasy Tsıfrlyq damý vedomstvosyndaǵy Tsıfrlyq kásipkerlik ortalyǵy seriktes bolady.

— Bizde osy jobaǵa ınvestıtsııa quıýdy sheshken jeke sektor bar. Osyǵan uqsas hab Kremnıı alqabynda da ashyldy. Ol jaqta 24 startap belsendi jumys istep jatyr, bireýi 1 mln dollardan astam qarjy tartty, - dep tolyqtyrdy QR vıtse-mınıstri.