Qazaqstan sarbazdary halyqaralyq oıyndardyń jańa baıqaýyna birinshi bolyp shyǵady

NUR-SULTAN. QazAqparat - Qazaqstandyq áskerı qyzmetshiler Armııalyq halyqaralyq oıyndar-2019 saıysynyń «At marafony» jańa baıqaýyna qatysýǵa daıyn, dep habarlaıdy QR Qorǵanys mınıstrliginiń baspasóz qyzmeti.

Mońǵolııa Qarýly Kúshteri Birikken oqý-jattyǵý ortalyǵynyń bazasyna kelgen sátten bastap bizdiń komanda tolyq tanystyrylym marshrýtynan ótti. Komandalar baıqaý marshrýttary boıynsha jol júrgen kezde at marafonynyń kezeńderi ótetin jerdiń landshaftymen tanysyp, jerebe tastaý arqyly jylqylardy iriktedi, atpen júrý úshin olardy júgendep, erttedi.

Qatysýshylar men bapkerler shtaby júrý jyldamdyǵyn emes, baıqaý kezeńderin durys ári sapaly oryndaýda sheberlikterin ushtady.

Qazaqstan quramasy ýaqyt pen aýa raıyndaǵy aıyrmashylyqqa qaramastan birden beıimdelip, jattyǵýlar barysynda qıyndyqtarǵa tap bolmady. Kezek boıynsha Qazaqstan komandasy qashyqtyqqa atpen shabý baıqaýynda birinshi bolyp shyqpaq. Odan keıin Qyrǵyzstan quramasy men Mońǵolııa shyqsa, Reseı komandasy bul saıysty túıindeıdi.

Aıta keteıik, at marafony 3-8 tamyz aralyǵynda ótedi. Baıqaý tórt kezeńnen, ıaǵnı, daıyndyq, at marafony, qysqa qashyqtyqqa aralas estafeta jáne sheshýshi kezeńnen turady.