Qazaqstan sapaly shıkizat tapshylyǵyna tap bolýy múmkin
ASTANA. QazAqparat - Qazaqstan sapaly shıkizat tapshylyǵyna tap bolýy múmkin. Bul týraly búgin Májiliste «Jer qoınaýy jáne jer qoınaýyn paıdalaný týraly» QR Kodeksi jobasyn tanystyrǵan QR Investıtsııalar jáne damý vıtse-mınıstri Tımýr Toqtabaev málim etti, dep habarlaıdy QazAqparat.
Onyń aıtýynsha, kodeks jobasynyń negizgi jańalyqtary paıdaly qazbalar qoryn esepke alýdyń halyqaralyq standarttarǵa negizdelgen júıesine kóshý, «birinshi ótinim» qaǵıdaty boıynsha jer qoınaýyn paıdalaný quqyǵyn berýdiń avstrııalyq modelin engizý, geologııalyq aqparattyń ashyqtyǵyn qamtamasyz etý, jer qoınaýyn paıdalanýshylardyń mindetti eseptiligi, jer qoınaýyn paıdalaný saldaryn joıý tártibin jetildirý bolyp tabylady.
Osyǵan oraı vıtse-mınıstr jer qoınaýyn paıdalanýdaǵy ınvestıtsııalyq ahýaldy jaqsartýǵa baǵyttalǵan shuǵyl sharalar qabyldanbasa, Qazaqstan orta merzimdi keleshekte kásiporyndar qajettiligin qamtamasyz etýde sapaly shıkizat tapshylyǵymen betpe-bet kelýi múmkin ekendigin basa aıtty.
«Qazaqstanda barlaýǵa jumsalatyn ınvestıtsııa kólemi 1 sharshy metrge shaqqanda nebári 7 dollardy quraıdy. Máselen, bul kórsetkish Avstralııada 168, al Kanadada 203 dollarǵa teń. Qazaqstan 1 sharshy metrdi zertteýge arnalǵan shyǵyndar kólemi boıynsha kóshbasshy elderden 20 jáne odan da kóp ese artta qalyp otyr. Bizge shuǵyl arada dál osy geologııalyq barlaýǵa ınvestıtsııa tartý qajet. Jer qoınaýy salasyndaǵy zańnamany álemniń úzdik tájirıbesine sáıkestendirmeı bul maqsatqa qol jetkize almaımyz», - dedi ol.
Onyń sózine qaraǵanda, Qazaqstannyń qazirgi geologııalyq áleýmeti sonaý keńestik zamanynda jasalǵan. Muraǵa myńnan astam ken oryndaryn alǵan elimiz sonyń arqasynda ınvestıtsııa tarta aldy jáne búgingi kúni ashylǵan ken oryndarynyń 90 paıyzdan astamyn ınvestorlar ıgerýde.
