Qazaqstan sapaly etti Qytaıǵa tasymaldaıdy

ASTANA. QazAqparat - Qazaqstannan Qytaıǵa premıým sanatyndaǵy etti jetkizý sharalary bıylǵa josparlanyp otyr. bul týraly QR Aýyl sharýashylyǵy mınıstrliginde tilshilermen kezdesý barysynda QR AShM vıtse-mınıstri Gúlmıra Isaeva málim etti.

 «Bizde tıisti basymdyqtar bar, ıaǵnı ónimdi premıým sanatta ótkize alamyz. Osy baǵytta «Atameken» ulttyq kásipkerler palatasymen jáne FAO-men (BUU Azyq-túlik jáne aýylsharýashylyq uıymy) birlesken jumystar atqarýdamyz. Bul turǵyda óndiristi sertıfıkattaý júıesi qajet. Bizdiń et organıkalyq ónim retinde ótýi úshin bul sharalardyń barlyǵyn tezirek iske asyrýǵa nıettimiz. Sol kezde Qazaqstannan jetkizilgen et sapaly ónim retinde qytaılyq dúken sórelerinde suranysqa ıe bolady»,-dedi G. Isaeva.

Onyń paıymynsha, elimizden jetkizilgen et QHR-da dámdik, organıkalyq sapasymen jáne qunarlyǵy jaǵynan óz satyp alýshylaryn tabady. 

«Máselen, organıkalyq ettiń quny aıtarlyqtaı joǵary. Qytaıda bir keli ettiń baǵasy 6-8 dollar aralyǵynda. Bul qazaqstandyq ónim óndirýshiler úshin óte jaqsy baǵa»,-dedi vıtse-mınıstr.

Onyń aıtýynsha, qazirgi kezde etti tasymaldaý boıynsha QHR-men barlyq kelissózder júrgizildi. Shamamen jyl sońyna deıin qazaqstandyq et qytaılyq dúkenderdiń sórelerinde paıda bolady.

«Qytaılyq tarappen kelissózder júrgizýde óte mańyzdy ilgerileý boldy. Osy rette ónimdi jetkizý bıyldyń ekinshi jartyjyldyǵynda iske asatynyn jaqsy túsinip otyrmyz. Bul qadamdar aldaǵy eki aıda júzege asyraly dep boljaýdamyz, ıaǵnı barlyq rásimder aıaqtalyp, bizdiń fermerler ónimdi atalǵan elge jetkizetin bolady»,-dedi G. Isaeva.