Qazaqstan sándik kóshet óndirisin damytyp, ımportqa táýeldilikti azaıtpaq
ASTANA. KAZINFORM - Premer-mınıstrdiń orynbasary – ulttyq ekonomıka mınıstri – Serik Jumanǵarınniń tóraǵalyǵymen ótken Úkimettegi keńeste otandyq sándik kóshet sharýashylyǵyn damytý máseleleri qaraldy, dep habarlaıdy Úkimettiń baspasóz qyzmeti.
Memleket basshysynyń orman alqaptaryn odan ári qalpyna keltirý jáne ulttyq saıabaqtar ınfraqurylymyn damytý jónindegi alǵa qoıǵan mindeti sheńberinde otandyq sándik ósimdikterdi ósirý sharýashylyǵyn damytý erekshe mańyzǵa ıe. Olar eldi mekenderdi abattandyrý jáne kógaldandyrý boıynsha jobalardy otyrǵyzý materıalymen qamtamasyz etedi. Keńeste salanyń negizgi máseleleri jáne otandyq óndiristi keńeıtý úshin qajetti sharalar qarastyryldy.
Qazirgi tańda Qazaqstan ımporttyq otyrǵyzý materıalyna táýeldilikti saqtap otyr. Sonymen qatar otandyq kóshet sharýashylyqtarynda ósirilgen ósimdikter jergilikti klımattyq jaǵdaılarǵa jaqsy beıimdelgen jáne ómir súrý deńgeıi joǵary. Sondaı-aq olar hımııalyq óńdeýge jáne ósý stımýlıatorlaryn qoldanýǵa az shyǵyndardy qajet etedi. Búginde ishki naryqtyń kólemin jáne ımportqa táýeldilik deńgeıin baǵalaý qıyn: resmı statıstıka sándik ósimdikterdiń óndirisin bólek eskermeıdi.
Sándik kóshet sharýashylyǵy – belgili bir tabıǵı-klımattyq jaǵdaılarǵa beıimdelgen standarttalǵan otyrǵyzý materıalyn óndirýge baǵyttalǵan ósimdik sharýashylyǵynyń jas, joǵary tehnologııalyq jáne ǵylymdy qajet etetin kishi salasy. Búgingi tańda jasyl keńistikter abattandyrý elementi ǵana emes, sonymen qatar ekologııalyq, ınjenerlik jáne estetıkalyq fýnktsııalardy oryndaıtyn qalalyq ınfraqurylymnyń mańyzdy bóligi bolyp sanalady. Ortalyq Azııa ósimdikter pıtomnıgi qaýymdastyǵynyń ókilderi atap ótkendeı, salada sándik daqyldarǵa standarttar joq. Jerdi paıdalaný máselesi de rettelmegen: QR Jer kodeksinde sándik kóshet ósirýge arnalǵan jerdiń jeke sanaty joq. Jerdiń nysanaly maqsatynyń qoldanystaǵy túrleri, onyń ishinde orman ósirý jáne baý-baqsha ósirý, keıinnen qazý jáne transplantatsııalaý arqyly ósimdikterdi ósirýdi kózdeıtin kóshetjaılar qyzmetiniń ereksheligin eskermeıdi. Aýylsharýashylyq jerlerinde jumys isteý kezinde kúrdeli jylyjaılar, qoımalar men avtomatty sýarý júıelerin salýǵa shekteýler týyndaıdy.
Taǵy bir másele sándik kóshet sharýashylyǵy salasyndaǵy qyzmet túrlerin jikteýge qatysty. Sala ókilderiniń pikirinshe, qoldanystaǵy jikteý ósirý ereksheligi men otyrǵyzý materıalyna qoıylatyn talaptardy eskere otyryp naqtylaýdy qajet etedi. Sonymen qatar keńeske qatysýshylar otandyq pıtomnıkter jelisin damytý jáne eksporttyq naryqtarǵa shyǵý úshin aıtarlyqtaı áleýetti atap ótti. Qazaqstannyń geografııalyq jaǵdaıy klımattyq jaǵdaılary uqsas elderge baǵdarlanýǵa múmkindik beredi. Kúrt kontınentaldy klımatta ósirilgen ósimdikter beıimdelý men ómir súrýdiń básekelestik artyqshylyǵyna ıe.
Keńes qorytyndysy boıynsha Serik Jumanǵarın Ekologııa mınıstrligine Aýyl sharýashylyǵy, Ónerkásip mınıstrlikterimen, ákimdiktermen jáne sala ókilderimen birlesip sándik kóshet sharýashylyǵynyń jaı-kúıine keshendi taldaý júrgizýdi tapsyrdy. Ol otandyq óndiris pen ımporttyń kólemin, óńirlerdiń qajettilikterin, sondaı-aq salany damytý úshin barlyq kedergilerdi qamtýy tıis. Sondaı-aq memlekettik organdar bıznestiń osy saladaǵy ekonomıkalyq qyzmet túrleriniń jiktelýin jetildirý jáne SEQ TN egjeı-tegjeıin jetildirý máselelerin pysyqtaıdy.
Aıta keteıik, osy kezde elimizde jabaıy ósimdikterdiń genetıkalyq qory zerttelip jatyr.
