Qazaqstan – San-Marıno matchynan keıin jankúıerler men eriktiler stadıonnyń qoqysyn jınady
Astanada jankúıerler eriktilermen birge Qazaqstan men San-Marıno quramalary arasyndaǵy matchtan keıin stadıonnyń qoqysyn jınady, dep habarlaıdy Kazinform elorda ákimdiginiń resmı saıtyna silteme jasap.
Elordalyq eriktiler men jankúıerler toby Eýro-2024 irikteý aıasynda Qazaqstan quramasynyń San-Marıno komandasyna qarsy matchynan keıin «Astana Arena» stadıonynda qoqys jınady.
Fýtbol jankúıerleri men elorda turǵyndarynyń belsendiligi ǵana emes, olardyń tazalyǵy kimdi bolmasyn tańǵaldyrdy. Óıtkeni tazalyq jumysyna «Astana Jastary» KMM belsendileri men eriktileri de, Astananyń turǵyndary da atsalysty.
Aıta keteıik, fýtboldan 2024 jylǵy Eýropa chempıonatyna irikteý satysy jetinshi týrynda Qazaqstan quramasy San-Marınodan basym tústi.
Memleket basshysy Qasym-Jomart Toqaev Qazaqstan ulttyq quramasynyń San-Marıno komandasyna qarsy oıynyna qoldaý kórsetý úshin «Astana Arena» stadıonyna keldi.
Memleket basshysymen birge ulttyq quramaǵa qoldaý bildirý úshin dańqty sportshylar, sport ardagerleri men mádenıet qaıratkerleri de keldi
Olardyń arasynda Qazaqstannyń halyq ártisi Dımash Qudaıbergen, mını-fýtboldan Qazaqstan ulttyq quramasynyń bas bapkeri Paýlý Rıkardý Fıgeıra Sılva (Kaka) jáne taǵy basqalary bar.
Kezdesý barysynda qazaqstandyq fýtbolshylar birden shabýylǵa kóshti. Dese de oǵan qarsylas qurama qorǵaýshylary laıyqty tótep bere bildi.
