Qazaqstan salyq salý ındıkatorlary boıynsha 183 memlekettiń ishinde 17-shi oryndy ıelendi

Bul týraly búgin Ortalyq Azııa men Shyǵys Eýropa elderindegi 2012 jylǵy salyq tólemderi máselesine arnalǵan baspasóz máslıhatynda Qarjy mınıstrliginiń Salyq komıteti tóraǵasynyń orynbasary Arǵyn Qypshaq málim etti.

Onyń derekterine qaraǵanda, salyq salymdary boıynsha Qazaqstan aldyńǵy jyly 26-shy orynda bolǵan. Qazir elimizdiń bul baǵyttaǵy jetistikteri eki esege artyp, 17-shi orynǵa jetti. «Bul Táýelsiz memleketter dostastyǵy elderi arasynda eń úzdik kórsetkish. Jaǵdaıdyń bulaısha qalyptasýyna 2009 jyly kúshine engen Salyq kodeksiniń normalary yqpal etip otyr. Osy kodekstegi normalar boıynsha eldegi basty salyq stavkileri tómendedi. Atap aıtqanda, elde korporatıvti paıda salyǵy 20 paıyzǵa azaıyp, qosalqy qun salyǵy 12 paıyzǵa kemidi. Sonymen qatar bizdiń salyq tóleýshilerdiń basty problemalary bolyp kelgen salyq esebin júrgizý máselesi sheshildi. Naqtyraq aıtqanda, salyq esepteri qazir jylyna bir ret qana jasalady. Keıbir salyq túrleri boıynsha ǵana toqsanyna bir ret esep daıyndalady. Buryn barlyq salyqtar boıynsha esep aı saıyn jáne toqsan saıyn júrgiziletin»,-deıdi komıtet tóraǵasynyń orynbasary.