Qazaqstan salyq boıynsha EAEO shartyna ózgeris engizetin qujatty qabyldady

ASTANA. QazAqparat – Búgin Senattyń jalpy otyrysynda «2014 jylǵy 29 mamyrdaǵy Eýrazııalyq ekonomıkalyq odaq týraly shartqa ózgerister engizý týraly hattamany ratıfıkatsııalaý týraly» Zań qabyldandy, dep habarlaıdy QazAqparat tilshisi.

Qarastyrylyp otyrǵan hattamaǵa 2021 jylǵy 8 aqpanda EAEO-ǵa múshe memleketterdiń basshylary qol qoıdy. Hattama EAEO-ǵa múshe memleketterdiń taýarlaryna jáne EAEO-ǵa múshe emes memleketterdiń taýarlaryna qatysty Reseı Federatsııasynyń AEA-synda qosylǵan qun salyǵyn alýdyń teń sharttaryna qol jetkizýdi qamtamasyz etýge múmkindik beredi.

«Hattama aıasynda EAEO týraly shartqa Reseı Federatsııasynyń jekelegen arnaıy ekonomıkalyq aımaqtarynda salyq salý bóliginde ózgerister engiziledi. Jalpy, EAEO týraly shartta onyń jumys isteýiniń jáne múshe memleketterdiń, onyń ishinde salyq salý máseleleri boıynsha ózara is-qımylynyń negizgi qaǵıdattary bekitilgen. Atap aıtqanda, janama salyqtardy óndirip alý tártibi jáne olardy múshe memleketterdiń ózara saýdasynda tóleý tetigi Sharttyń №18 qosymshasynda qamtylǵan. Múshe memleketterdiń arnaıy ekonomıkalyq aımaqtaryna taýarlardy ımporttaý kezinde erkin keden rásimi qoldanylady», - dedi QR Premer-Mınıstriniń orynbasary – Qarjy mınıstri Erulan Jamaýbaev.

Osy oraıda EAEO-nyń Keden kodeksiniń 201-babynyń 1-tarmaǵyna sáıkes, taýarlar arnaıy ekonomıkalyq aımaqtarynda kedendik bajdardy, salyqtardy jáne basqa da ótemaqy bajdaryn tólemeı ornalastyrylady jáne paıdalanylady.

«Alaıda EAEO-nyń Keden kodeksiniń 455-babynyń 6-tarmaǵyna sáıkes, Reseı Federatsııasynyń 3 arnaıy ekonomıkalyq aımaǵynda múshe elderdiń aýmaǵynan ımporttalatyn taýarlar boıynsha kedendik bajdar men salyqtar birden tólenedi. Al úshinshi elderden ımporttaǵan kezde, kedendik bajdar men salyqtar tólenbeıdi. Bul turǵyda osy aımaqtarda kásipkerler úshin EAEO-nyń elderinen góri úshinshi elderden taýarlardy ımporttaý tıimdirek. Óz kezeginde, Hattama normalary atalǵan arnaıy ekonomıkalyq aımaqtarǵa EAEO-dan jáne úshinshi elderden taýarlardy ımporttaý kezinde teń jaǵdaılar jasaýǵa múmkindik beredi», - dedi Qarjy mınıstr.

Atap aıtqanda, Hattama EAEO elderinen ımporttalǵan taýarlar boıynsha kórsetilgen aımaqtarda 180 kún ishinde keıinge qaldyra otyryp, qosylǵan qun salyǵyn tóleýdi kózdeıdi.