Qazaqstanda SAF avıatsııalyq otynyn óndiretin zaýyt salynbaq
ASTANA. KAZINFORM – QR Energetıka mınıstrliginde Vıtse-mınıstr Qaıyrhan Tutqyshbaevtyń Halyqaralyq azamattyq avıatsııa uıymynyń (IKAO) Eýropalyq jáne Soltústik Atlant aımaqtyq bıýrosynyń dırektory Nıkolıa Rallo myrzamen kezdesýi ótti.
Kezdesýde taraptar avıatsııa salasyn turaqty damytý máselelerin, sonyń ishinde Qazaqstanda turaqty avıatsııalyq otyn SAF (Sustainable Aviation Fuel) óndirý jáne engizý perspektıvalaryn talqylady.
Vıtse-mınıstr atap ótkendeı, Qazaqstan «jasyl» transformatsııa protsesine belsendi qatysyp jatyr, jańartylatyn energııa kózderin jáne ekologııalyq turaqty jobalardy damytýǵa basa nazar aýdaryp otyr. Turaqty avıatsııalyq otyn óndirý men damytý eldiń avıatsııa sektoryndaǵy shyǵaryndylardy azaıtýdyń mańyzdy bóligi bolmaq.
Energetıka mınıstrligi amerıkalyq LanzaJet kompanııasymen birlesip turaqty avıatsııalyq otyn óndirý jobasyn iske asyrýǵa múddeli.
Qaıyrhan Tutqyshbaevtyń aıtýynsha, otandyq munaı óńdeý zaýyttary qysqa merzim ishinde Jet A-1 markaly avıaotyn óndirisine kóshýge daıyn.
Mınıstrlik málimetinshe, budan bólek, qazir otandyq zaýyttarda avıaotyn óndirý kólemin 2026–2032 jyldar aralyǵynda 1,7 mln tonnaǵa deıin arttyrýdy kózdeıtin iri jobalar júzege asyrylyp jatyr.
Qazaqstanda ekologııalyq avıaotyn óndiretin zaýyt salynatynyn jazǵan edik.