Qazaqstan sabaqtastyqty jańarta otyryp, saıası júıesin jańartyp keledi — ázerbaıjandyq sarapshy
ASTANA. KAZINFORM — Qazaqstandaǵy qazirgi saılaý ókiletti bıliktiń jańa modelin qalyptastyrý aıasynda ótip jatqandyqtan erekshe áleýmettik-saıası mańyzǵa ıe. Bul týraly Kazinform agenttiginiń Bakýdegi menshikti tilshisine bergen suhbatynda ázerbaıjandyq taldaýshy jáne sarapshy, CASPIA taldaý ortalyǵynyń dırektory Orhan Iolchýev málimdedi.
— Qazaqstan jaı ǵana jańa parlamenttiń jańa quramyn saılap otyrǵan joq — el zań shyǵarý júıesin jańartyp jatyr. Sondyqtan qazirgi saılaýdy bólek saıası oqıǵa retinde emes, konstıtýtsııalyq ózgertýlerli qoǵamdyq talqylaý, ulttyq referendým, jańa Konstıtýtsııany qabyldaý jáne keıingi saılaýlardy qosa alǵanda saıası jańarýdyń dáıekti protsesiniń bóligi retinde qarastyrý kerek, — dedi sarapshy.
Onyń baǵalaýynsha, saıası partııalardyń róli de túbegeıli ózgerip jatyr. Proportsıonaldy júıege kóshý jáne ózin-ózi usynýdy joıý partııalardyń kandıdattardy tańdaýda jáne saılaýaldy platformalarynyń mazmunyna jaýapkershiligin arttyrady.
— Bul model partııalyq básekelestiktiń mańyzdylyǵyn arttyrýǵa yqpal etip otyr. Qoǵamǵa tek jalpy urandar ǵana emes, sonymen qatar ekonomıkalyq jáne aımaqtyq damý, bıznesti qoldaý, jumys oryndaryn qurý, bilim berý jáne tehnologııalyq damý boıynsha naqty sheshimder qajet, — dep atap ótti Iolchýev.
Ol sondaı-aq osy saılaý naýqanynyń sıpatyna nazar aýdardy. Onyń aıtýynsha, ol jetkilikti túrde syndarly, saıası rıtorıkanyń aıtarlyqtaı radıkaldanýynsyz ótti.
— Saılaýlar kóbinese polıarızatsııa men ózara aıyptaýlarmen qatar júretin qazirgi saıası keńistik úshin pikirtalastyń mazmundy talqylanýyn saqtaý qabileti — saıası jetilýdiń kórsetkishi, — dep bildirdi pikirin taldaýshy.
Iolchýev jastar men bıznes ókilderiniń belsendi qatysýyn erekshe atap ótti. Onyń pikirinshe, bul qoǵamnyń memlekettik basqarý júıesindegi kásibılik pen jańa quzyrettilikterge degen suranysyn kórsetedi.
— Adamı kapıtal úshin jahandyq básekelestik jaǵdaıynda bilikti mamandar strategııalyq resýrsqa aınalyp otyr. Jeke sektor ekonomıka, aımaqtyq damý, ınvestıtsııala jáne jumys oryndaryn qurýdyń praktıkalyq qajettilikterin jaqsy túsinetindikten, kásipkerlerdiń belsendi qatysýy da mańyzdy, — dep atap ótti ol.
Sarapshynyń pikirinshe, jańa parlamenttik modeldiń sońǵy baǵasy Quryltaı jumysyn bastaǵannan keıin múmkin bolady.
— Kez kelgen jańa júıeni is júzinde synaqtan ótkizý qajet. Quryltaı jumysyn bastaǵannan keıin qaı tetikterdiń tıimdi jumys istep jatqany jáne qaısysyn odan ári jetildirýdi qajet etetini aıqyndalady. Myqty júıe — eshqashan ózgermeıtin emes, turaqtylyqty saqtaı otyryp, jetile alatyn júıe, — dedi Iolchýev.
Onyń aıtýynsha, sabaqtastyq mańyzdy qaǵıda bolyp qala beredi. Ókildi bıliktiń jańa qurylymy Qazaqstannyń jınaqtaǵan saıası tájirıbesin joqqa shyǵarmaıdy, kerisinshe, onyń jańa ınstıtýtsıonaldyq jaǵdaılarda odan ári damýyn boljaıdy.
Iolchýev Qazaqstanda bolyp jatqan protsesterdiń Ázerbaıjan úshin de mańyzdy ekenin atap ótti.
— Qazaqstan — Ázerbaıjannyń Ortalyq Azııadaǵy negizgi seriktesi jáne túrki álemindegi saıası jáne ekonomıkalyq damýdyń mańyzdy ortalyqtarynyń biri. Sondyqtan onyń memlekettiligin nyǵaıtý jáne saıası júıesiniń turaqty damýy tek Qazaqstannyń ózi úshin ǵana emes, sonymen qatar keńirek eýrazııalyq keńistik úshin de mańyzdy, — dep qorytyndylady sarapshy.
Osyǵan deıin Bakýde Quryltaı saılaýy kezinde saılaýshylardyń belsendiligi baıqalyp otyrǵanyn jazdyq.
