Qazaqstan Rýmynııamen saıası dıalogty nyǵaıtýǵa, ózara is-qımyldy keńeıtýge nıetti
ASTANA. QazAqparat - 2017 jylǵy 15 shildede Qazaqstan Respýblıkasy men Rýmynııa arasyndaǵy dıplomatııalyq qatynastar ornaýynyń 25 jyldyǵy atalyp ótiledi, dep habarlaıdy QazAqparat QR Syrtqy ister mınıstrliginiń baspasóz qyzmetine silteme jasap.
«Astana men Býharest arasyndaǵy dostyq qatynastar saıası dıalogynyń, saýda-ekonomıkalyq jáne mádenı-gýmanıtarlyq yntymaqtastyqtyń qaryshty damýyna qolaıly jaǵdaı jasaýda. BUU, EQYU jáne basqa da halyqaralyq uıymdar sheńberinde eki eldiń óz kúshterin úılestirýi taraptardyń jaqyndasýyna septigin tıgizedi. 2007 jyly Qazaqstan Respýblıkasynyń Prezıdenti Nursultan Nazarbaevtyń Rýmynııaǵa resmı sapary ekijaqty qatynastardyń mańyzdy kezeńi boldy. 2010 jyly Rýmynııanyń Prezıdenti Qazaqstanǵa eki márte sapar shekti. Parlamenttik jáne úkimettik delegatsııalardyń saparlarmen almasýy júıeli iske asyrylyp, eleýli kelisimsharttyq negiz quryldy», - delingen baspasóz baıanynda.
Eki eldiń syrtqy saıası mekemeleri arasyndaǵy birlesken is-áreketter jospary sheńberindegi júıeli saıası konsýltatsııalar yntymaqtastyqtyń mańyzdy quraldarynyń biri bolyp tabylady.
Sonymen qatar, Qazaqstannyń syrtqy saıasat vedomstvosy ekijaqty ózara is-qımyldy damytýdyń pármendi tetiginiń quraly retinde Saýda-ekonomıkalyq jáne ǵylymı-tehnıkalyq yntymaqtastyq jónindegi úkimetaralyq komıssııasyn atap ótedi. Elder kóliktik-tranzıttik áleýetin, sonyń ishinde Transkaspıılik halyqaralyq kólik marshrýty sheńberinde tıimdi paıdalanýǵa nıetti ekenine nazar aýdarady.
«Rýmynııa Qazaqstannyń mańyzdy saýda-ekonomıkalyq áriptesteriniń biri bolyp tabylady. Qazaqstan, óz kezeginde, osy el ekonomıkasynyń iri ınvestorlarynyń biri bolýda. Іskerlik baılanystardy jandandyrýǵa turaqty múddelilik tanytylýda. Mádenı-gýmanıtarlyq jáne bilim berý salalaryndaǵy yntymaqtastyq belsendi damýda. Qazaqstanda, atap aıtqanda Almatyda «Uly Shtefan», Qaraǵandyda «Dachııa» jáne Pavlodarda «Býkovına» rýmyn ulttyq-mádenı qoǵamdary jemisti qyzmet atqarýda. 20 myńnan astam qazaqstandyq rýmyndar halyqtar arasyndaǵy dostyqtyń damýy men nyǵaıýynyń baılanystyrýshy kópiri bolyp tabylady. Qazaqstan Rýmynııamen saıası dıalogty ári qaraı nyǵaıtýǵa jáne jan-jaqty ózara is-qımyldy keńeıtýge berik ustanady» delingen dıplomatııalyq qatynastar ornaýynyń 25 jyldyǵyna arnalǵan kommıýnıkede.
