Qazaqstan Rýmynııa, Majarstan jáne Qytaıda termınal salmaq
ASTANA. KAZINFORM – Qazaqstan Rýmynııa, Majarstan jáne Qytaıda júk termınaldaryn salý máselesin qarastyryp jatyr. Bul týraly Kólik mınıstrliginiń Temirjol jáne sý kóligi komıteti tóraǵasynyń orynbasary Nurjan Kelbuǵanov aıtty.
— Qazaqstannyń sheteldegi júk qalyptastyrý núkteleri geografııasyn keńeıtý boıynsha sharalar qabyldanyp jatyr. Qazirgi ýaqytta Lıanıýngan portynda jáne Sıan qalasynyń qurǵaq portynda Qazaqstan-Qytaı termınaldary jumys istep tur. Sondaı-aq qazaqstandyq jeke sektor Potı portynda termınal saldy, — dedi ol Ortalyq kommýnıkatsııalar qyzmetindegi brıfıngte.
Komıtet tóraǵasy orynbasarynyń málimetinshe, qazirgi tańda Alıat portynda, Máskeý mańyndaǵy Selıatıno stansasynda, Belarýstegi Svısloch stansasynda jáne Tashkentte termınaldar salynyp jatyr. Olardyń jalpy qýattylyǵy jylyna 1 mln-nan astam konteınerdi quraıdy.
— Bolashaqta Rýmynııa, Majarstan (Býdapesht) jáne Qytaıdyń Úrimshi (ShUAR) qalasynda birlesken termınaldar uıymdastyrý máselesi qarastyrylyp jatyr. Jalpy alǵanda, syrtqy termınaldyq qýattar 4 esege ósip, jylyna 2 mln 500 myń konteınerge jetedi. Bul óz kezeginde júk aǵyndaryn kólik ınfraqurylymymyzǵa tartýǵa múmkindik beredi. Osy jasalyp jatqan jobalardyń arqasynda tranzıt 3 esege artyp, 76 mln-ǵa jetetin bolady. Bul elimizdiń kóliktik-tranzıttik áleýetiniń damýyna úlken úles qosady, — dedi Nurjan Kelbuǵanov.
Eske sala keteıik, buǵan deıin Grýzııanyń Potı portynda Qazaqstannyń termınaly ashylatynyn jazǵan bolatynbyz.
