Qazaqstan rýhanı dıplomatııany nyǵaıtýdyń mańyzdy úlgisi boldy - Dúnıejúzilik ıslam lıgasy

ASTANA. KAZINFORM – Qazaqstan dinder men mádenıetter ókilderi arasynda kópir ornatýdyń mańyzdy úlgisi boldy. Bul týraly elordadaǵy forýmda Dúnıejúzilik ıslam lıgasy Bas hatshysynyń orynbasary Abdýlrahman ál-Zaıd málim etti.

- Búgin Qazaqstandaǵy mańyzdy forýmda kezdesýge keldik. Qazaqstan rýhanı dıplomatııany nyǵaıtýdyń, túrli dinder men mádenıetterdiń ókilderi arasynda kópir ornatýdyń mańyzdy úlgisi boldy. Bul mańyzy joǵary forým búgin segizinshi ret ótip otyr jáne qazirgi álemdegi negizgi ıdeologııalyq oqıǵalardyń biri sanalady. Osy jıyn óziniń nátıjesimen jáne maqsatymen búkil álemniń nazaryn aýdara bastady. Sonymen qatar, bul forým kóshbasshylardyń qoǵamdyq kelisimdi nyǵaıtýǵa jáne búkil álemde beıbitshilik ornatýǵa baǵyttalǵan órkenıettik kózqarasyn kórsetedi, - dedi Abdýlrahman ál-Zaıd Álemdik jáne dástúrli dinder lıderleri Sezi hatshylyǵynyń XXIII otyrysynda.

Osy oraıda ol Dúnıejúzilik ıslam lıgasy búkil álemde beıbitshilikti nyǵaıtý, memleketterdiń qoǵamynda kelisim ornatý úshin ujymdyq jumysty jalǵastyrýǵa múdelli ekenin atap ótti.

- Biz qarýly qaqtyǵystarǵa sebepshi bolǵan barlyq kórinisti aıyptaımyz. Beıbitshilik jolyndaǵy áriptesterimizdi, barlyq din ókilderin yntamaqtastyq ornatýǵa shaqyramyz, - dedi.

Bul turǵyda Dúnıejúzilik Islam Lıgasy Bas hatshysynyń orynbasary Ýkraına men Reseı arasyndaǵy qaqtyǵysty toqtatýǵa, Gazadaǵy máseleni sheshýge bar kúsh-jigerdi salý kerek ekenin aıtty. Osy oraıda Gaza boıynsha barlyq halyqaralyq mindettemeler oryndalýy tıis.

Aıta keteıik, BUU málimetinshe, Gazada mert bolǵan palestınalyqtar sany resmı kórsetkishten 10 ese kóp.