Qazaqstan-Rýanda taýar aınalymynyń damýyna logıstıka kedergi

ASTANA. QazAqparat – Premer-mınıstrdiń orynbasary – Ulttyq ekonomıka mınıstri Serik Jumanǵarın Qazaqstan men Rýanda qarym-qatynasyna pikir bildirdi.

- Qazir №1 ónimimiz – bıdaı men un. Ótken jyldyń qyrkúıek aıynan eseptegende 9 aıdyń qorytyndysynda 10 mln tonna bıdaı eksporttadyq. Onyń ishinde bir kelisimshart - Marokkomen. Al Rýandamen qarym-qatynasta tek saýda emes saıasat ta bar. Eki memlekettiń qarym-qatynasy óte jaqsy. Sebebi halyqaralyq uıymdarda bir-birimizdiń bastamalarymyzdy árqashanda da qoldaımyz. Rýanda Prezıdenti óte belsendi, reformator, tanymal tulǵa», - dedi vıtse-premer.

Onyń atap ótýinshe, otandyq kompanııalar Afrıkanyń biraz memleketinde tabysty jumys istep jatyr.

- Rýandany aıtar bolsaq, byltyrǵy jalpy taýar aınalymymyz 300 myń dollardy quraıdy. Jalpy aıtqanda barlyǵy ımport. Rýandadan kıim alamyz, arasynda shamaly hımııa bar. Bıyl 100 myń dollar boldy. Al búkil Afrıka elderin eseptesek, 1 mlrd dollarǵa jetpeıdi, 780 mln dollar ǵana. Bul nege baılanysty? Sebebi logıstıka óte qıyn», - dedi Serik Jumanǵarın.

Buǵan deıin Memleket basshysy Qasym-Jomart Toqaev Aqordada Qazaqstanǵa resmı saparmen kelgen Rýanda Prezıdenti Pol Kagameni qarsy alǵanyn jazǵan edik.