«Qazaqstan» RTRK túrkııalyq TRT-men jobalardy birlesip júzege asyrmaq
ANKARA. QazAqparat - QR Prezıdenti Nursultan Nazarbaevtyń Túrkııa Respýblıkasyna resmı sapary aıasynda «Qazaqstan» teleradıokorporatsııasy men túrkııalyq «TRT» radıoteledıdarkorporatsııasy arasynda ekijaqty ózara túsinistik pen yntymaqtastyq týraly memorandýmǵa qol qoıyldy, dep habarlaıdy QazAqparat.
Ekijaqty qujatqa «Qazaqstan» RTRK» AQ Basqarma tóraǵasy Erlan Qarın jáne Túrkııa Radıo Teledıdar korporatsııasynyń Bas dırektory Ibrahım Eren qol qoıdy.
Memorandýmnyń negizgi maqsaty - radıo jáne televızızııa salasynda birlesip jobalardy júzege asyrý jáne tájirıbe almasý. Memorandým buqaralyq aqparat quraldarynyń basym baǵyttary boıynsha jumysty nyǵaıtýǵa jáne shyǵarmashylyq yntymaqtastyqty keńeıtýge baǵyttalǵan. Jalpy «Qazaqstan» teleradıokorporatsııasy men TRT korporatsııasynyń arasyndaǵy qarym-qatynas birneshe jyldar boıy turaqty túrde damyp keledi. Bul memorandým medıa saladaǵy ekijaqty jumysty odan ári jetildirip, jańa serpin berýge septigin tıgizedi.
Aıta keterligi, Túrkııanyń basty habar taratýshysy - TRT korporatsııasy 1964 jyldyń 1 mamyrynda qurylǵan bolatyn. Búgingi kúnde TRT korporatsııasynyń quramyna «TRT HD», «TRT Habar», «TRT Çocuk», «TRT-Avaz» jáne t.b. 10-nan astam túrli halyqaralyq, respýblıkalyq, aımaqtyq telearnalar men radıolar kiredi.
