«Qazaqstan» RTRK» AQ «Men-qazaqpyn» atty halyqaralyq megajobaǵa baıqaý jarııalady
ASTANA. QazAqparat - «Qazaqstan» RTRK» AQ atadan balaǵa mıras bolǵan ult ónerin urpaqqa nasıhattaý maqsatynda «Men-qazaqpyn» atty halyqaralyq megajobaǵa baıqaý jarııalady. Bul aýqymdy baıqaýǵa qazaqstandyqtardan basqa, Reseı Federatsııasy, Qytaı Halyq respýblıkasy, Monǵolııa men Altaıda turatyn qandastarymyz da qatysady. Óz kezeginde atalǵan joba qazaq óneriniń baı mýzykasyn halyqqa keńinen tanytýǵa jol ashatyn bolady.
«Men-qazaqpyn» atty halyqaralyq megajobanyń tanystyrylymy 2017 jyldyń 11 mamyrynda Ortalyq kommýnıkatsııalar qyzmetinde Aqparat jáne kommýnıkatsııa mınıstri Dáýren Abaev pen «Qazaqstan» RTRK» AQ Basqarmasynyń tóraǵasy Erlan Qarınniń qatysýymen ótti.
«Elbasy rýhanı jańǵyrý jónindegi jalpyulttyq ıdeıany jarııalaǵanda, jańǵyrý úderisi mindetti túrde eldiń ulttyq rýhanı tamyrynan nár alýy tıis ekendigin eskerdi. Osyny eskere otyryp «Men - qazaqpyn!» atty televızııalyq megajobany usynyp otyrmyz. «Men - qazaqpyn!» jobasynyń túpki nátıjesi rýxanı murany urpaq kádesine jarata otyryp, ulttyq tutastyqty nyǵaıtý bolýy tıis, ıaǵnı bul barsha xalqymyzdyń basyn qosyp, judyryqtaı jumyldyratyn joba bolýy kerek»,- dedi mınıstr D. Abaev.
Jobanyń maqsaty, tól ónerimiz - jyr-termelerdi, kúıdi odan ári damytyp, búgingi kún talabyna sáıkes jańashalandyryp, óskeleń urpaqqa jetkizý. "Qulaqtan kirip, boıdy alar, ásem án men tátti kúı", - deıdi danagóı Abaı. Án dese ishken asyn jerge qoıatyn qazaq halqy mýzyka ónerin qatty qurmetteıdi. Elimizdegi toı-tomalaq ánsiz ótpeıdi. Ánsiz, tipti, qazaqty elestetý de múmkin emes.
Árbir oblys ortalyqtarynda arnaıy irikteý týrlary ótkizilip, eń júıriktileri Respýblıkalyq televızııalyq baıqaýǵa joldama alady. Elimizge tanymal termeshiler, kúıshiler men jyrshylardan quralǵan qazylar alqasy qatysýshylardy iriktep alady.
Baıqaýǵa 18 ben 40 jas aralyǵyndaǵy, halyq kompozıtorlarynyń jáne halyq ánderin dombyra, qobyz, syrnaı aspaptarynyń súıemeldeýinde oryndaıtyn ónerpazdar qatysa alady. Baıqaýǵa qatysatyn úmitkerlerdiń sahnalyq kıimi qazaqy úlgimen tigilgen, búgingi zamanǵa saı bolýy kerek.
Úmitkerlerdiń tapsyratyn qujattary:
- jeke bas kýálikteriniń kóshirmesi;
- ómirbaıany;
- oqıtyn (oqýshylar men stýdentter úshin), jumys isteıtin jerinen anyqtama;
- sapaly elektrondy nusqadaǵy sýreti;
- ár kezeńde oryndalatyn shyǵarmalar tizimi.
Konkýrsqa qatysýshylardyń ótinishteri konkýrstyń bastalýynan 20 kún buryn jergilikti jerdegi uıymdastyrýshylardyń elektrondy adresine jiberilýi tıis:
Baıqaýdyń jeńimpazdary Astana qalasynda bas qosyp, baǵdarlama aıasynda arnaıy statýetkamen, sonymen qatar, «Jyldyń eń úzdik dástúrli ánshisi», «Jyldyń eń úzdik termeshisi», «Jyldyń eń úzdik kúıshisi» jáne baıqaı laýreaty nomınatsııalarymen marapattalady.
Aıta keteıik, «Men qazaqpyn» halyqaralyq baıqaýdyń alǵashqy irikteý týrlary 5 maýsymda bastalyp, qyrkúıek aıynda kózi qaraqty kórermen nazaryna usynylady.
Jobanyń birinshi toqtaıtyn mekenderi - Almaty men Aqtóbe qalasy. Búgingi tańda «Qazaqstan» RTRK» AQ-da jobaǵy qatysty komanda músheleri aıqyndaldy. Olar eki top bolyp, elimizdegi 14 oblys pen 2 qala, ıaǵnı 16 óńirge shyqpaq. Al óńirde ótkizilgen irikteýlerdiń tolyq nusqasy Qazaqstan Ulttyq arnasynyń jergilikti arnalarynda kórsetiledi dep kútilýde. Qazaqstan Ulttyq arnasynyń ekranynda óńirlik irikteý tek 15 mınýttyq kúndelik retinde kórermen nazaryna usynylyp otyrady. Aıta keteıik, «Men qazaqpyn» jobasynyń prodıýseri Qýanysh Sultan men efırdegi kúndelik júrgizýshisi Allajar Qaıbar.
