Qazaqstan rohındjalyq 626 myń bosqyn taǵdyryna alańdaýshylyq bildirdi - SІM
ASTANA. QazAqparat - BUU Qaýipsizdik Keńesinde Mıanmadaǵy jaǵdaı boıynsha otyrysy ótip, onda BUU Bas hatshysynyń saıası máseleler jónindegi orynbasary Djeffrı Feltmannyń baıandamasy tyńdaldy. Otyrysqa Qazaqstan tarapy da qatysty, dep habarlaıdy QazAqparat SІM baspasóz qyzmetine silteme jasap.
Djeffrı Feltmannyń sózine qaraǵanda, Mıanmanyń Rakhaın shtatyndaǵy zorlyq-zombylyqtyń deńgeıi tómendegenine qaramastan, ondaǵy bosqyndar legi tolastaǵan emes, aýyldarǵa órt qoıý oqıǵalary áli de jalǵasýda. Máselen, 25 tamyzdan bergi kezeńde 626 myńnan astam bosqyn Mıanmanyń Bangladeshpen shekarasyn kesip ótken. Bunyń ishinde 36 myńnan astam bala Balgladeshke ata-analarynsyz nemese eresektersiz jetken.
«Mıanma bıligi Halyqaralyq Qyzyl Krest Komıtetine ruqsat bergenimen, sosyn Dúnıejúzilik azyq-túlik baǵdarlamasy kómek kórsetkenimen, BUU-nyń basqa mekemeleri men olardyń áriptesterine Rakhaın shtatynyń soltústik bóligine áli de shekteýlerdi almaı otyr», - dep atap ótti BUU Bas hatshysynyń orynbasary.
Dj. Feltman aǵymdaǵy jyldyń 23 qarashasynda Mıanma men Bangladesh arasynda rohındja bosqyndaryn qabyldaý týraly Memorandýmǵa qol qoıylǵanyn aıtty. Sonymen qatar, ol Mıanma bıligin, sonyń ishinde áskerılerdi zorlyq-zombylyq jasamaýǵa, násildik jekkórýshilikter týǵyzbaýǵa shaqyrdy.
Otyrys barysynda Qazaqstan delegatsııasy rohındjanyń 626 myń bosqynyna, eń birinshi kezekte balalar men áıelderdiń qıyn jaǵdaıyna úlken alańdaýshylyq bildirdi. Sondaı-aq, Qazaqstan Bangladesh Úkimeti men basqa da halyqaralyq uıymdar jáne donorlardyń bosqyndarǵa ýaqytsha baspana berý, medıtsınalyq kómek kórsetý, azyq-túlikpen qamtý boıynsha jasaǵan ıgi sharalaryn atap ótedi.
Budan bólek, Qazaqstan delegatsııasy Mıanma men Bangladesh arasyndaǵy bosqyndardy erikti túrde qaıtarý týraly 23 qarashada qol qoıylǵan memorandýmǵa qoldaý bildirdi. Eki eldiń birlesken jumys toby barlyq rohındjalyqtyń Mıanmadaǵy óz úılerine qaýipsiz, laıyqty ári erikti túrde qaıtýyn qamtamasyz ete alatynyna senim bildirdi. Sonymen bir mezgilde, qazaqstandyq tarap adam quqyǵynyń óreskel buzylý jaǵdaılaryn tergeýge, sondaı-aq qaqtyǵystardyń túpki sebepterin joıýǵa shaqyrdy.
Otyrys barysynda BUU Bas hatshysynyń qaqtyǵystar jaǵdaıyndaǵy jynystyq zorlyq-zombylyq máseleleri jónindegi Arnaıy ókili Pramıla Patten de baıandama jasady. Ol jaqynda ǵana Bangladeshte bosqyn rohındjalyqtardyń lagerinde bolyp qaıtqan edi. Arnaıy ókil «tiri qalǵan bosqyndardan jynystyq zorlyq-zombylyqtyń sumdyq oqıǵalaryn» estigenin jetkizdi. Bundaı sumdyqty negizinen Mıanma áskerı kúshteriniń qyzmetkerleri jasaǵan bolyp otyr. Arnaıy ókildiń aıtýynsha, kóptegen málimetter halyqaralyq gýmanıtarlyq quqyqtyń aıtarlyqtaı buzylǵanyn kórsetedi. Osyǵan baılanysty ol BUU QK múshelerin Mıanmaǵa, sonymen qatar Bangladeshte ornalasqan bosqyndar lagerine barýǵa shaqyrdy.
Qaýipsizdik Keńesi músheleriniń basym bóligi Mıanmadaǵy jaǵdaıdyń aıtarlyqtaı alańdaýshylyq týǵyzyp otyrǵanymen kelisti. Olar el bıligin BUU qyzmetkerleri men halyqaralyq gýmanıtarlyq uıymdar ókilderiniń kedergisiz ótýin qamtamasyz etýge shaqyrdy. Birqatar delegatsııalar rohındjalyqtarǵa shabýyldaýlarda genotsıd belgileri kórinis tabatynyn atap ótti.
Sondaı-aq, Mıanma bıliginen Rakhaın shtaty problemalary boıynsha K.Annannyń Konsýltatıvtik keńesiniń usynymdaryn dereý júzege asyrý máselesi talap etildi.
