Qazaqstan robototehnıka quramasy Koreıadaǵy álem chempıonatynda óner kórsetedi
ASTANA. KAZINFORM – Qazaqstandyq oqýshylar Koreıa Respýblıkasynda ótetin FIRST Global Challenge 2026 chempıonatynda el namysyn qorǵaıdy.
Astanada robototehnıkadan FIRST Global Challenge 2026 halyqaralyq chempıonatynyń ulttyq kezeńi aıaqtaldy. Jarys qorytyndysy boıynsha álem chempıonatynda Qazaqstan atynan óner kórsetetin bes oqýshy anyqtaldy.
Qurama músheleriniń barlyǵy Almaty qalasyndaǵy Mahatma Gandı atyndaǵy № 92 mamandandyrylǵan lıtseıinde jáne Ybyraı Altynsarın atyndaǵy № 159 gımnazııasynda bilim alady.
Qazaqstan quramasynyń sapyna myna oqýshylar endi:
• Abdýlla Arnur Nurlanuly;
• Berdalı Aspandııar Hamıtuly;
• Serik Nurtas Erboluly;
• Endibaı Erasyl Dilmuraduly;
• Maqsut Hýseın Asetuly.
Jarys Qazaq ulttyq sport ýnıversıtetiniń bazasynda ótti. Oǵan Qazaqstannyń ár óńirinen 40-qa jýyq komanda, sondaı-aq Ózbekstannan kelgen qonaq komandalar qatysty.
Bıyl qatysýshylar orman órtteriniń aldyn alý, olardyń saldaryn barynsha azaıtý jáne zardap shekken aýmaqtardy qalpyna keltirý boıynsha ınjenerlik-tehnologııalyq sheshimder ázirledi.
2026 jyly FIRST Global Challenge halyqaralyq ǵylymı jobalar konkýrstarynyń tizbesine engizildi. Onyń jeńimpazdary men júldegerleri «bakalavrıat» sanaty boıynsha «Bolashaq» halyqaralyq stıpendııasyna úmitker bola alady.
Qazaqstan quramasy robototehnıkadan tórt dúrkin álem chempıony. Bıyl álem chempıonaty Inchhon qalasynda ótip, 190 elden 1 000-nan astam qatysýshynyń basyn qosady.
Ulttyq kezeńdi USTEM Foundation qoǵamdyq qory Qazaqstan Respýblıkasy Oqý-aǵartý mınıstrliginiń, Qazaqstan Respýblıkasy Jasandy ıntellekt jáne tsıfrlyq damý mınıstrliginiń, «Daryn» respýblıkalyq ǵylymı-bilim berý ortalyǵynyń, Astana Hub halyqaralyq ınnovatsııalyq klasteriniń, sondaı-aq Astana Motors quramyna kiretin OMODA & JAECOO brendiniń qoldaýymen uıymdastyrdy.
Aıta ketelik Qazaqstandyq stýdentter robototehnıkadaǵy úzdik sheshimi úshin júlde alǵan edi.
