Qazaqstan Rıo Olımpıadasynyń keminde 110 lıtsenzııasyn utyp alýǵa úmitti

ASTANA. QazAqparat - Qazaqstan Rıo Olımpıadasynyń keminde 110 lıtsenzııasyn utyp alýǵa úmitti. Bul týraly búgin QR Mádenıet jáne sport mınıstrligi men Qazaqstan Olımpıada komıtetiniń birlesken keńeıtilgen jınalysynda Sport jáne dene shynyqtyrý isteri komıtetiniń tóraǵasy Elsııar Qanaǵatov málim etti.

«Sporttyq jeńis nátıjelerimen halyqaralyq arenada memleketimizdiń ulttyq mereıin kórsetetin 31-shi jazǵy Olımpıada oıyndaryna 268 kún, 15-shi Paralımpıada oıyndaryna 101 kún qalsa, jasóspirimder arasyndaǵy 2-shi qysqy Olımpıada oıyndaryna tek 93 kún qaldy. Osy aldymyzda turǵan úsh halyqaralyq mańyzdy jarysqa daıyndyq jaıynda baıandaýǵa ruqsat etińizder», - dedi ol.

Komıtet basshysynyń aıtýynsha, Rıoda ótetin jazǵy Olımpıadaǵa qatysatyn sportshylarymyzdy daıyndaý jáne uıymdastyrý sharalary atqarylyp jatyr. Qazirgi ýaqytta aldaǵy Olımpıada oıyndaryna josparlanǵan joldamalardy jeńip alý úshin Qazaqstan qurama komandalarynyń zor jeńiske jetýi úshin barlyq jaǵdaı jasalýda.

«Bizdiń aldymyzda jaýapty syn, zor mindetter tur. Sondyqtan qalǵan ýaqytymyzda qolǵa alynbaı jatqan qosymsha is-sharalardy durys júıege qoıyp, keıbir bar kemshilikterdi joıyp, daıyndyq jumystaryna belsendi qatysýǵa shaqyramyn. Aldaǵy Olımpıada oıyndarynda sporttyń 42 túrinen 306 medaldar jıyntyǵy sarapqa salynady», - dep atap ótti E.Qanaǵatov.

Onyń sózine qaraǵanda, Qazaqstannyń Olımpıada komandasy sapyna qosylýǵa úmitkerler tizimine 500-den astam sportshy, 93 jattyqtyrýshy engizilgen.

«Bizdi qurama komanda sapyna qosylýǵa úmitkerlerdiń arasyndaǵy básekelestiń ótken Beıjiń men London olımpıadalyq tsıkli kezeńine qaraǵanda eselep óskeni qýantady. Keminde 25 sport túrinen joq degende 110 olımpıadalyq lıtsenzııa utyp alý josparlanyp otyr. Londonda sporttyń 25 túrinen 105 lıtsenzııa bolǵan edi»,- dedi komıtet basshysy.