Qazaqstan resýrstyq ekonomıkadan ınnovatsııalyq modelge aýysady – Ekologııa mınıstrligi
«Bizdiń dástúrli jıynǵa jańa qatysýshylardyń qosylǵany qýantady. Bul ekologııalyq máselelerge beı-jaı qaramaıtyndardyń qatary artqanyn kórsetedi. Qazaqstan Respýblıkasy álemdik qaýymdastyqtyń tolyqqandy qatysýshysy bola otyryp, kedeılikti joıýǵa, teńsizdik pen ádiletsizdikke qarsy kúreske jáne klımattyq ózgerister problemalardyn sheshýge baǵyttalǵan turaqty damýdyń 17 maqsatyn qamtıtyn 2030 jylǵa deıingi kún tártibinde qoıylǵan mindetterdi oryndaý boıynsha birqatar mindetteme qabyldady», - dedi QR Ekologııa, geologııa jáne tabıǵı resýrstar vıtse-mınıstri Ahmetjan Pirimqulov konferentsııanyń ashylý saltanatynda.
Spıker Qazaqstannyń Eýrazııa qurlyǵynyń ekologııalyq turaqtylyǵyn qamtamasyz etýde erekshe ról atqaratynyn atap ótti. Qazaqstannyń jer kólemi, klımattyq jaǵdaıynyń alýan túrliligi, óńirdegi sý teńgeriminiń erekshelikteri tutas Eýrazııa aýmaǵyndaǵy ekologııalyq ahýalǵa yqpal etedi.
«Qazaqstannyń aldynda turaqty, teńgerimdi, «jasyl» ósimge qol jetkizý jóninde aýqymdy mindet tur. 2050 jylǵa qaraı elimiz resýrsqa baǵdarlanǵan ekonomıkadan anaǵurlym taza, ınnovatsııalyq jáne ártarapty modelge aýysý arqyly álemniń damyǵan otyz eliniń qataryna kirýge umtylýda. Bul úshin memlekettik basqarý júıesin jetildirýge, ekonomıkanyń ashyqtyǵy men básekege qabilettiligin arttyrýǵa, ekologııaǵa baǵdarlanǵan damýǵa kómektesetin qaıta qurýlar qajet. Ult kóshbasshysy belgilep, Prezıdent Qasym-Jomart Toqaev jalǵastyrǵan «jasyl» baǵyt memlekettik reformalar úshin baǵdar qyzmetin atqarady. Damýdyń ekonomıkalyq, ekologııalyq, áleýmettik jáne saıası faktorlaryn biriktirip, Qazaqstan halqynyń ómir súrý sapasyn arttyrýǵa baǵyttalǵan birtutas protsess retinde qaralýy kerek», - dedi A. Pirimqulov.
Sonymen birge, vıtse-mınıstr ekologııanyń shegi men ulty bolmaıtynyn, sondyqtan tek úılesimdi, birlesken kúsh-jigermen ǵana aıtarlyqtaı nátıjelerge qol jetkizetinderin eske saldy.
«Bizdiń búgingi kezdesýimiz ekologııalyq sananyń, ekologııalyq sanany reformalaýdyń qajetti jáne mindetti ekenin túsinýge jasalǵan taǵy bir qadam bolady dep úmittenemin», - dedi Ahmetjan Pirimqulov.
Aıta keteıik, konferentsııanyń basty spıkerleri retinde qazaqstandyq sarapshylar jáne Lastanýdyń aldyn alý jáne baqylaý jónindegi Eýropalyq keshendi bıýronyń basshysy Serj Roýdıe, BUU ESKATO Qorshaǵan orta jáne damý departamentiniń dırektory Stefanes Fotıý, Qorshaǵan orta jónindegi nemis agenttiginiń ónerkásiptik shyǵaryndylar dırektıvasy jónindegi ýákiletti ulttyq organnyń sarapshysy Katıa Kraýs sııaqty taıaý jáne alys shetelden kelgen sarapshylar qatysady.
