Qazaqstan Respýblıkasynyń «Prezıdent týraly» jáne «Saılaý týraly» zańdary Májilistiń jalpy otyrysynda qaralatyn boldy

Búgin atalmysh qujattardy Májilistiń Zańnama sot-quqyqtyq reformalar komıtetiniń otyrysynda talqylaǵan depýtattar osyndaı sheshimge keldi.

Májilis depýtaty Ramazan Sárpekovtyń aıtýynsha, Konstıtýtsııalyq keńestiń qorytyndy sheshiminen keıin referendým ótkizý máselesi toqtatylyp, kezekten tys prezıdenttik saılaý ótkiziletin boldy. «Sonyń negizinde Parlamentke «Konstıtýtsııaǵa tolyqtyrýlar engizý týraly» sondaı-aq «Prezıdent týraly» jáne «Saılaý týraly» konstıtýtsııalyq zańdyq kúshi bar qujattarǵa ózgerister engizý jónindegi zań jobalary kelip tústi. Búgingi Parlament palatalarynyń birlesken otyrysynda «Konstıtýtsııaǵa tolyqtyrýlar engizý týraly» zańy eki oqylymda qaralyp, qabyldandy. Bul joǵary zańdyq kúshi bar qujat bolǵan soń ózgelerden buryn qaraldy. Al búgin Májilistiń Zańnama jáne sot-quqyqtyq reformalar komıtetinde «Prezıdent týraly» jáne «Saılaý týraly» konstıtýtsııalyq zańdyq kúshi bar qujattar talqylandy. Bul qujattar Májilistiń jalpy otyrysynda qaralatyn bolyp sheshildi. Atalmysh qujattar belgilengen tártip boıynsha Májilistiń sodan soń Senattyń qaraýynan ótýi kerek. Osy talqylaýlardan soń ǵana qujattar Prezıdenttiń qol qoıýyna jiberiledi»,-dedi depýtat.

Onyń sózine qaraǵanda, Prezıdenttiń kezekten tys saılaýyn ótkizý merzimi osy qujattar kúshine engen soń belgilenedi.