Qazaqstan Respýblıkasynyń keıbir konstıtýtsııalyq zańdaryna ózgerister engiziledi
ASTANA. 8 qazan. QazAqparat - Parlament Májilisine Úkimetten «Qazaqstan Respýblıkasynyń keıbir konstıtýtsııalyq zańdaryna ózgerister engizý týraly» jańa konstıtýtsııalyq zań jobasy kelip tústi.
Bul zań jobasymen elimizdiń birqatar konstıtýtsııalyq zańdaryna ózgerister engizilgeli tur. Atap aıtqanda, «Qazaqstan Respýblıkasyndaǵy saılaý týraly» 1995 jylǵy 28 qyrkúıektegi Qazaqstan Respýblıkasynyń Konstıtýtsııalyq zańyna, «Qazaqstan Respýblıkasynyń Parlamenti jáne onyń depýtattarynyń mártebesi týraly» 1995 jylǵy 16 qazandaǵy Qazaqstan Respýblıkasynyń Konstıtýtsııalyq zańyna, «Qazaqstan Respýblıkasynyń Konstıtýtsııalyq Keńesi týraly» 1995 jylǵy 29 jeltoqsandaǵy Qazaqstan Respýblıkasynyń Konstıtýtsııalyq zańyna, «Qazaqstan Respýblıkasynyń Tuńǵysh Prezıdenti - Elbasy týraly» 2000 jylǵy 20 shildedegi Qazaqstan Respýblıkasynyń Konstıtýtsııalyq zańyna jáne «Qazaqstan Respýblıkasynyń sot júıesi men sýdıalarynyń mártebesi týraly» 2000 jylǵy 25 jeltoqsandaǵy Qazaqstan Respýblıkasynyń Konstıtýtsııalyq zańyna ózgerister engiziledi. Úkimettiń bergen túsindirmesinde zań jobasy boıynsha sybaılas jemqorlyqqa qarsy, ǵylymı, ekonomıkalyq jáne lıngvıstıkalyq saraptamalar júrgizilgeni atap kórsetilgen. Zań jobasyn ázirleýshiler jańa redaktsııa Qylmystyq is júrgizý kodeksi jobasynyń novellalarymen kelisilgenin jazady. Sotqa deıingi is júrgizý túbegeıli ońaılatylǵany atap ótilgen. Sondaı-aq jańa jobamen «sotqa deıingi tergeý» uǵymy engiziledi, kýágerler tartý jáne tehnıkalyq quraldardy qoldaný máseleleri reglamentteledi. Osy zań jobasyn qabyldaý azamattardyń quqyqtary men bostandyqtaryn, qoǵam men memlekettiń múddelerin qylmystyq qol suǵýshylyqtan tıimdi qorǵaýdy qamtamasyz etedi, quqyq buzýshylyqtardyń aldyn alý tıimdiligin arttyrady.
