Qazaqstan Respýblıkasynyń dástúrli dinderiniń ókilderinen ózge barlyq shetel mıssıonerleriniń qyzmetine tyıym salý kerek - Almatydaǵy baspasóz máslıhaty
MATY. 11 qarasha. QazAqparat /Názıra Eleýhan/ - Almatyda «Saentologııa shirkeýi», «Iegova kýágerleri», «Tın Chellındj Qazaqstan», «Novaıa jızn» jáne taǵy da basqa dinı sektalar men ondaǵy emshilerden zardap shekken top baspasóz máslıhatyn uıymdastyryp, tıisti memlekettik organdardan atalmysh dástúrli emes dinı uıymdardyń qyzmetin jaýyp, olardy joıýdy talap etýde.
Olardyń aıtýynsha, ondaı dástúrli emes dinder adamdardyń ómirin kúl-talqan etip, týra joldan adastyryp, otbasyn buzýda, psıhologııalyq ásermen qatar, kúsh kórsetý arqyly quldarǵa aınaldyrýda. «Odan da sumdyǵy ol aǵymdar adam psıhıkasyn buzyp, esten aıyryp, adamdardy qylmysqa ıtermeleýde», - deıdi olar.
«Ókinishtisi, jyldan-jylǵa bul sektalarǵa adamdar kóp tartylýda. Ol sektalar aldaý-arbaýdyń túrli tásilderimen ózderine tartýda. Kóbine olar jasóspirimder men jastardy, qaltasy qalyń kásipkerlerdi, úıi-kúıi, jaǵdaıy bar adamdar men jalǵyz basty zeınetkerlerdi uıymǵa kirgizýge tyrysady. Onda bir ret basyn suqqan adam «gıpnoz ben olardyń bizge beımálim áserine ushyrap, jyndy adam bolyp qalady». Olar óz paıdalary men múddelerine, ıaǵnı qolynda bar baılyǵyn, páterin, aqshasyn qaýym úshin «qurban etýge» májbúrleıdi, quldarǵa aınaldyrady, keıbirin tipti óz-ózin asylyp óltirýge deıin aparady. Essizdendirýge túsken adamdar sońǵy aqshalaryn, bar múlkin berýde. Budan da sumdyǵy, sektalardaǵy jalǵan emshiler adamdarǵa oılaryna kelgenin jasap, eshkim bilmeıtin dáriler men qoldan jasalǵan tunbalardy berýde. Ábden qoldanǵasyn «Qudaıǵa qajetiń joq eken, baqytty bolýǵa laıyq emessiń» degen syndy sózderdi aıtyp shyǵaryp salady»,- deıdi dinı sektalardan zardap shekender.
«Men Saentologııa shirkeýiniń shyrmaýyna 1998 jyly tústim. Oǵan tipti meniń otbasym da kirdi. Qazirdiń ózinde kúıeýim sonda. Ol bizdiń úıge jınaǵan 18 myń dollarymyzdy, barlyq dúnıe-múlkimizdi salyp, onymen qoımaı sektaǵa qyzymyzdy tartty. Ony endi jibermeı otyr. Men qyzymdy qalaı shyǵaryp alsam dep dal bolýdamyn. Otbasymyzdyń baqytyn oıran etip, taǵdyrymyzdyń kúl-talqanyn shyǵarǵan bul sektalardy joıý kerek», - dedi Saentologııa dinı uıymynan zardap shekken Gúlshahar Jaqypova.
«Biz «dástúrli emes» dinderdiń bolý faktoryn QR zaıyrly demokratııalyq memleket ekendigin dáleldeıtin jáne árbir azamattyń is júzinde senim erkindigine ıe ekendigin bildiretindigin jaqsy bilemiz. Biraq, alaıaqtyq jasap, senim arqyly aqsha taýyp, el úkimetine baǵynbaý men zańdardy saqtamaýǵa shaqyryp otyrǵan, el birligi men tatýlyǵyna iritki salyp otyrǵan sektanttyq jáne kommertsııalyq sıpatqa ıe bul dinı sektalardyń jumys jasaýy durys emes dep sanaımyz. Olarǵa qatysty qatań sharalar qoldanylyp, elden alastatylýy kerek dep esepteımiz. Ol úshin eń aldymen Qazaqstan Respýblıkasynyń din jáne dinı senim bostandyǵy jónindegi Zańyna ózgerister engizilýi qajet», - deıdi olar.
Zardap shekkenderdiń ortaq pikiri boıynsha elimizde tek «dástúrli» dinder qalyp, «dástúrli emes» jańa dinder, batys jáne shyǵys dinderi alastatylyp, qyzmetterine tyıym salynýy kerek.
Qazaqstandaǵy bul uıymdardyń artynda kimder tur, olardyń qyzmetin qarjylandyryp, qoldaý bildirip kele jatqandar kimder? Baspasóz máslıhatyna qatysýshylar nege Qazaqstan azamattaryna qatysty alaıaqtyq pen zorlyq-zombylyq kórsetýge tyıym salatyn zańdarymyz «jumys istemeıdi» degen suraqtardy alǵa qoıyp otyr.
Shara sońynda olar memleket óz azamattaryn qorǵap, qaýipsiz ómir men azamattyq erkindik syndy zańdy quqyqtarymyzdyń iske asýyna kómektesedi degen úlken úmitterin bildirdi.
