Qazaqstan Respýblıkasynyń azamattaryn bıýdjet qarajaty esebinen shetelge emdelýge jiberý týraly erejege ózgerister engizildi
Qazaqstan Respýblıkasy Úkimetiniń qaýlysy
2012 jylǵy 28 jeltoqsan Astana, Úkimet Úıi, № 1723
«Qazaqstan Respýblıkasynyń azamattaryn bıýdjet qarajaty esebinen shetelge emdelýge jiberý erejesin bekitý týraly» Qazaqstan Respýblıkasy Úkimetiniń 2009 jylǵy 4 jeltoqsandaǵy № 2016 qaýlysyna ózgerister men tolyqtyrý engizý týraly
Qazaqstan Respýblıkasynyń Úkimeti qaýly etedi:
1. «Qazaqstan Respýblıkasynyń azamattaryn bıýdjet qarajaty esebinen shetelge emdelýge jiberý erejesin bekitý týraly» Qazaqstan Respýblıkasy Úkimetiniń 2009 jylǵy 4 jeltoqsandagy № 2016 qaýlysyna (Qazaqstan Respýblıkasynyń PÚAJ-y, 2009 j., № 57, 491-qujat) mynadaı ózgerister men tolyqtyrý engizilsin:
kórsetilgen qaýlymen bekitilgen Qazaqstan Respýblıkasynyń azamattaryn bıýdjet qarajaty esebinen shetelge emdelýge jiberý erejesinde:
6-tarmaq mynadaı redaktsııada jazylsyn:
«6. Densaýlyq saqtaý basqarmasy patsıenttiń medıtsınalyq qujattaryn jumys organyna qolma-qol nemese ınternet-baılanysy arqyly olardy tirkegen sátten bastap úsh jumys kúni ishinde jetkizedi.»;
12-tarmaq mynadaı redaktsııada jazylsyn:
«12. Komıssııanyń patsıentti kezektilik nemese basym tártippen sheteldik medıtsına uıymdaryna emdelýge jiberý (jiberýden bas tartý) týraly sheshimi Komıssııa otyrysynyń hattamasymen resimdeledi.
Basym tártippen balalar, júkti áıelder, patsıentter aýrýdyń bir beıini bóligindegi qalyptasqan kezektilikke sáıkes týystyq donor bolǵan jaǵdaıda aǵzalardy, tinderdi transplanttaý júrgizýdi qajet etetin patsıentter, sondaı-aq densaýlyq jaǵdaıy ómirine qaýip tóndiretin patsıenter jiberiledi.»; mynadaı mazmundaǵy 19 jáne 20-tarmaqtarmen tolyqtyrylsyn:
«19. Sheteldik klınıkalarǵa emdelýge óz betinshe shyqqan patsıentterdiń materıaldaryn Komıssııa qaramaıdy jáne shyǵystary tóleýge jatpaıdy.
20. Sheteldik medıtsına uıymdarynyń qyzmetine aqy tóleý Ýákiletti organ men sheteldik medıtsına uıymdarynyń arasyndaǵy jeke sharttyń negizinde júzege asyrylady. Shart emdeý ádisterine jáne uzaqtyǵyna qaraı uzaq merzimdi sıpatqa ıe bolýy jáne emdeýge kezeń-kezeńimen aqy tóleýdi kózdeýi múmkin.
Emdeýge kezeń-kezeńimen aqy tóleý patsıentti sheteldik medıtsına uıymyna aǵzalar men tinderdi transplanttaýǵa jibergen jaǵdaıda kózdeledi. Bul rette emdeýdiń birinshi kezeńi sheteldik medıtsına uıymynda donordy tańdaý, sondaı-aq tikeleı donordy izdestirý úshin patsıentti qajetti zertteýler júrgizýdi kózdeıdi. Donordy tańdaǵan jaǵdaıda patsıent emdeýdiń ekinshi kezeńine - aǵzalar men tinderdi transplanttaýǵa jiberiledi. Patsıenttiń birinshi jáne ekinshi kezeńdegi, sondaı-aq alyp júretin adamnyń jol júrýine aqy tóleýdi Komıssııanyń sheshimi boıynsha ýákiletti organ júzege asyrady. Aǵzalar men tinderdi transplanttaý kezinde emdeýdiń árbir kezeńine Ýákiletti organ sheteldik medıtsına uıymymen jeke shart jasasady.
Ýákiletti organ atqarylǵan jumystardyń aralyq aktileri boıynsha sheteldik klınıkaǵa aı saıyn aqy tóleýdi júrgizedi. Sheteldik medıtsına uıymynda patsıentti emdeýge túpkilikti tólem atqarylǵan jumystardyń qorytyndy aktisi boıynsha júzege asyrylady.
Ýákiletti organ sheteldik medıtsına uıymyna patsıentti shetelde emdeý boıynsha sharttyń jalpy somasynan 70%-ǵa deıingi mólsherde avans tóleıdi, odan basqa atqarylǵan jumystardyń aralyq aktileri boıynsha sheteldik medıtsına uıymyna buryn tólengen avansty ustap qalý shartymen aı saıynǵy tólemdi júrgizedi. Sharttyń jalpy somasynan 10%-dan kem emes mólsherdegi túpkilikti tólem sheteldik medıtsına uıymy atqarylǵan jumystardyń qorytyndy aktisin usynǵannan keıin júzege asyrylady.».
2. Osy qaýly alǵashqy resmı jarııalanǵan kúninen bastap kúntizbelik on kún ótken soń qoldanysqa engiziledi.
Qazaqstan Respýblıkasynyń Premer-Mınıstri S. AHMETOV.
