Qazaqstan Respýblıkasynyń Avtokólik tasymaldaýshylary jáne ekspedıtorlar qaýymdastyǵy quryldy
ALMATY. Maýsymnyń 16-sy. QazAqparat /Erbol Turymbetov/ - Respýblıkalyq avtokólik tasymaldaýshylary usynysymen «Qazaqstan Respýblıkasynyń Avtokólik tasymaldaýshylary jáne ekspedıtorlar qaýymdastyǵy» atty zańdy tulǵalar birlestigi quryldy. Bul búgin Ulttyq baspasóz klýbynda ótken májiliste aıtyldy,
dep habarlaıdy QazAqparat.
2010 jyldyń 2-shi sáýirinde uıymnyń Quryltaıshylar jınalysy ótken edi. Al osy jyldyń 5-shi mamyrynda Almaty qalalyq Ádilet departamentinde memlekettik tirkeýden ótti. Qaýymdastyq Qazaqstan Respýblıkasynyń Azamattyq kodeksine, «Kommertsııalyq emes ujymdar týraly» jáne basqa da memlekettik zań aktilerine sáıkes qurylǵan. Uıymnyń maqsaty júk tasymaldaý men kólik tasymaly júıesin damytý, kólik tasymaly naryǵynyń qalyptasýyna jańa zań erejelerin daıyndaý. Sonymen qatar, Qaýymdastyq músheleriniń quqyǵyn, múddelerin qorǵaý jáne olardyń memlekettik, halyqaralyq uıymdarmen yntymaqty qarym-qatynasyna jaǵdaı jasaý.
«Kólik jáne kommýnıkatsııa mınıstrligi men jergilikti ákimdikter bul salada óz álinshe jumys jasaýda. Tipti arnaıy zań jobasy da bar. Biraq tar sheńberdi qamtıtyn bul sharalar barlyq máselelerdi sheshe almaı keledi. Soǵan baılanysty, biz kólik tasymaldaýshylarynyń kúrdeli máselelerin sheshýde óz úlesimizdi qosý úshin osy qaýymdastyqty qurdyq. Mınıstrlik bizdiń bastamamyzdy jyly qabyldap, uıymnyń qurylýyna qoldaý bildirdi», dedi Avtokólik tasymaldaýşylary men ekspedıtorlar qaýymdastyǵynyń basqarma tóraǵasy Álimǵojınov Serik. Onyń aıtýynsha, 2015 jylǵa deıin baǵyttalǵan QR-nyń Kólik strategııasyna saı Qaýymdastyq tasymaldaýshylar men memleket arasyndaǵy baılanysty nyǵaıtýda eńbek etedi.
