«Qazaqstan Respýblıkasyndaǵy saılaý týraly» Konstıtýtsııalyq zańǵa 778 tolyqtyrý men ózgeris engizildi - QR Ortalyq saılaý komıssııasy
ASTANA. 22 jeltoqsan. QazAqparat /Marlan Jıembaı/ - «Qazaqstan Respýblıkasyndaǵy saılaý týraly» Konstıtýtsııalyq zańǵa 778 tolyqtyrý men ózgeris engizildi. Bul týraly búgin elordada ótken QR Prezıdenti janyndaǵy Adam quqyǵy jónindegi komıssııanyń keńeıtilgen otyrysynda QR Ortalyq saılaý komıssııasy tóraǵasynyń orynbasary Vladımır Foos aıtty.
El Konstıtýtsııasymen jáne «Qazaqstan Respýblıkasyndaǵy saılaý týraly» Zańmen, sonymen qatar Halyqaralyq azamattyq jáne saıası quqyqtar týraly paktimen kepildendirilgen azamattardyń saılaý quqyǵyn qamtamasyz etý máselesine arnalǵan alqaly jıynda V.Foos arnaıy baıandama jasap, ol komıssııa músheleriniń tarapynan maquldandy.
Onyń atap ótýinshe, qazaqstandyq zańnama el azamattarynyń saılaý quqyǵyna jetkilikti túrde kepildik beredi. Saılaýshy retindegi azamattardyń barlyq saılaý quqyǵy zańda tolyǵymen saqtalǵan.
Elimizdiń saılaý zańyn jetildirý jáne halyqaralyq saılaý quqyǵy normalaryna sáıkes keltirý maqsatynda 778 tolyqtyrý men ózgeris engizilgenin basa aıtqan ol: «Biz árbir saılaý ótken saıyn daýys berý barysynda saılaýshylardyń aldynan eshqandaı kedergi shyqpaýy úshin zańǵa tolyqtyrýlar men ózgerister engizemiz», - dedi.
