«Qazaqstan Respýblıkasyndaǵy memlekettik baqylaý men qadaǵalaý týraly» zań jobasyna arnalǵan dóńgelek ústel ótýde
ASTANA. Qazannyń 22-i. QazAqparat /Aıdar Ospanalıev/ - Búgin Astanadaǵy Qazaq memlekettik zań ýnıversıtetinde Ádilet mınıstrligi bastama jasap otyrǵan «Qazaqstan Respýblıkasyndaǵy memlekettik baqylaý men qadaǵalaý týraly» zań jobasyna arnalǵan dóńgelek ústel otyrysy ótti.
Atalmysh sharaǵa Ádilet mınıstrligi men Ortalyq saılaý komıssııasynyń jáne prokýratýra organdarynyń ókilderi, sondaı-aq jáne joǵary oqý oryndarynyń ustazdary men zańger mamandar qatysty. Zań jobasyn talqylaýǵa úkimettik emes uıym ókilderi de atsalysty. «Bul óte mańyzdy qujat. Osyǵan qaraı bizge qazir baqylaý degen ne, qadaǵalaý degen degen máselelerdi taǵy bir oı eleginen ótkizip, pysyqtap shyqqan durys. Sebebi búgingi tańda baqylaý men qadaǵalaý degen uǵymdy durys túsinbeý jaǵdaılary kóptep oryn alyp otyr. Osyǵan baılanysty keıde keıbir qadaǵalaýshy organdar tarapynan asyra silteýshilikterge de jol berilýde. Búgin biz osy máseleni quzyrly mınıstrlikter men vedomstvo ókilderimen jáne zańgerlermen talqyǵa salǵanymyz jón bolar degen nıetpen bas qosyp otyrmyz», - dedi Zań ǵylymynyń doktory, professor Jumabek Busyrmanov.
Onyń sózine qaraǵanda, kópshiliktiń talqylaýyna usynylyp otyrǵan zań jobasy elimizdegi baqylaý jáne qadaǵalaý qyzmetterin júzege asyrýǵa qajetti sharttardy qalyptastyrýǵa baǵyttalǵan. Osyǵan baılanysty májiliske qatysýshylar qadaǵalaý men baqylaý uǵymdarynyń, baqylaýshy organnyń naqty qyzmeti, memlekettik tekserýlerdi ońtaılandyrý men olardy zań negizinde retke keltirý sııaqty máselelerdi talqyǵa salyp, olar boıynsha ózara pikir almasatyn bolady. Sondaı-aq olar Memleket basshysynyń quqyq qorǵaý organdary men sot qyzmetin jetildirý jónindegi Jarlyǵynda kórsetilgen mindetterdiń júzege asyrylý barysyn jáne osy mindetter boıynsha oryn alyp otyrǵan problemalardy da talqyǵa salmaq.
