«Qazaqstan Respýblıkasynda jilik maıyn transplantatsııalaý jáne onkogematologııalyq aýrýlardy emdeý perspektıvasy» atty halyqaralyq ǵylymı-tájirıbelik konferentsııa ótedi
ASTANA. 21 qyrkúıek. QazAqparat - Erteń elordada «Qazaqstan Respýblıkasynda jilik maıyn transplantatsııalaý jáne onkogematologııalyq aýrýlardy emdeý perspektıvasy» atty halyqaralyq ǵylymı-tájirıbelik konferentsııanyń ashylý saltanaty ótedi, dep habarlady «Ulttyq medıtsınalyq holdıng» AQ-nyń baspasóz qyzmetinen.
Atalǵan sharany ótkizýdiń ózektiligi qazaqstandyq gematologııa praktıkasynda halyqaralyq tájirıbeni engizý qajettiligine negizdeledi. Alqaly jıynnyń negizgi maqsaty elimizdegi gematologııa salasynda kórsetiletin medıtsınalyq kómek sapasyn arttyrý, respýblıkadaǵy gematologııalyq qyzmetke sheteldik áriptesterdiń nazaryn aýdarý, sonymen qatar memleket aýqymynda halyqqa halyqaralyq deńgeıde gematologııalyq kómek kórsetý qajettiligin ózektilendirý bolyp tabylady.
Qan júıesiniń aýrýy búkil álemde densaýlyq saqtaý salasyndaǵy negizgi problemalardyń biri bolyp tabylady. Qazaqstanda jyl saıyn leıkoz aýrýyna 1500-den astam eresek adam shaldyǵyp, 500-den astam adam qaza tabady.
Elimizdiń densaýlyq saqtaý mınıstrligi onkogematologııa máselerine erekshe nazar aýdarýda. Atap aıtqanda, 2009 jyldan bastap naýqastardy dári-dármekpen qamtamasyz etý aıtarlyqtaı jaqsaryp, terapevtıkalyq baǵdarlamalardyń zamanaýı baǵyttaryn qoldaný múmkindigi paıda boldy.
Degenmen leıkoz aýrýyn emdeýdiń joǵary tehnologııalyq ádisin, jilik maıyn transplantatsııalaý qajettigi týyndap otyr. Orta Azııa óńirinde jilik maıyn transplantatsııalaý boıynsha ota jasalǵan emes. Al Reseıde atalǵan ádisti qoldanatyn 18 bólimshe jumys isteıdi.
Qazaqstanda patsıentiń jilik maıyn aýtologııalyq transplantatsııalaý 2010 jyly 29 jeltoqsanda elordadaǵy Qan ortalyǵynyń qatysýymen Respýblıkalyq jedel medıtsınalyq kómek ǵylymı ortalyǵynda jasaldy.
Іs-shara aıasynda gematologııa salasynda oqytý semınarlary men sheberlik sabaqtaryn ótkizý josparlanýda. Konferentsııa jumysyna gematologııa salasynda jumys isteıtin medıtsınalyq uıymdardyń, óńirlik densaýlyq saqtaý basqarmalarynyń, halyqaralyq uıymdardyń ókilderi qatysady.
