Qazaqstan Respýblıkasynda organdyq donorlyqty nasıhattaý boıynsha aýqymdy aktsııa bastaldy - Densaýlyq saqtaý mınıstrligi
ASTANA. 26 jeltoqsan. QazAqparat - «Erteń Ulttyq baspasóz klýbynda transplantologııa salasyndaǵy jáne organdyq donorlyqty nasıhattaý boıynsha jumystyń alǵashqy qorytyndylary men osy sala boıynsha 2012 jylǵa daıyndalyp otyrǵan josparǵa qatysty baspasóz máslıhaty ótedi»,
- dep habarlaıdy Densaýlyq saqtaý mınıstrliginiń baspasóz qyzmeti.
Atalmysh sharaǵa Densaýlyq saqtaý mınıstrliginiń Medıtsınalyq kómekti uıymdastyrý departamentiniń dırektory - Ajar Tóleǵalıeva,
«Respýblıkalyq jedel medıtsınalyq járdem ǵylymı ortalyǵy» aktsıonerlik qoǵamynyń transplantologııa jónindegi keńesshisi Ǵanı Quttymuratov, Densaýlyq saqtaý mınıstrliginiń shtattan tys bas transplantology Oryngúl Narmanova, táýelsiz sarapshy, dáriger-nefrolog Nadejda Petýhova, Astana qalasy №1 qalalyq balalar aýrýhanasynyń bas dárigeri, qalalyq máslıhat depýtaty - Úmitjan Ospanova qatysady.
«Qazaqstan Respýblıkasynda organdyq donorlyqty nasıhattaý boıynsha aýqymdy aktsııa bastaldy. Qazaqstan úshin bul sharanyń mańyzy zor: elimizde baýyr, búırek, júrek jáne t.b. kez-kelgen donorlyq organdy aýystyryp salýdy qajetsinetin 7 myńnan astam naýqas turady. Osy adamdardyń kóbisiniń ómiri qyl ústinde tur jáne kez-kelgen sátte úzilip ketýi múmkin. Olardyń arasynda balalar da az emes... Organdy transplantatsııalaý (aýystyryp salý) - adam ómirin saqtap qalýdyń jalǵyz tásili. Organdyq donorlyq - tranplantologııanyń túbirli máselesi. Qaıtys bolǵannan keıin organdyq donorlyqqa kózi tirisinde kelisý - bul moraldyq, sondaı-aq dinı turǵydan alyp qaraǵanda adamgershilik áreket. Sonymen qatar, bul máselege jynysyna, jasyna, ultyna, ustanatyn dinine, materıaldyq ıgiligine qaramastan kez-kelgen adam tap bolýy múmkin. Ádette aýrý aıtpaı keledi, bizdiń árqaısymyzdy, otbasylarymyzdyń múshelerin, dostarymyzdy, áriptesterimizdi jaýlap ala alady»,-delingen mınıstrliktiń baspasóz baıanynda.
