«Qazaqstan Respýblıkasy. Táýelsizdik shejiresi» atty tarıhı dereknamalyq kóptomdyq jaryqqa shyqty
STANA. Sáýirdiń 15-i. QazAqparat /Jasulan Amanbaıuly/ - Búgin Astanadaǵy QR Prezıdenttik mádenıet ortalyǵynda «Qazaqstan Respýblıkasy. Táýelsizdik shejiresi» atty tarıhı dereknamalyq kóptomdyqtyń alǵashqy 14 kitabiniń tusaýkeser rásimi ótti,
dep habarlaıdy QazAqparat.
2 myń danamen, ázirshe 14 tom kóleminde jaryq kórgen jobanyń avtory - kórnekti memleket jáne qoǵam qaıratkeri, fılologııa ǵylymdarynyń doktory, professor Myrzataı Joldasbekov.
«Elimizde derektaný ǵylymynyń qalyptasyp, damymaǵandyǵynyń saldarynan ata tarıhymyz negizinen ańyzdarǵa, shejirelerge, batystyń qaısybir kúmándi derekterine súıenip jazylyp keldi. Shym-shytyryq qazaq tarıhy aýyzsha taralyp kelgendikten, osy kúnge deıin bir izge túspeı-aq qoıdy. Búginde qansha tarıhshy bolsa, sonsha pikir bar», deıdi M. Joldasbekov.
Onyń aıtýynsha, «eń ókinishtisi - qazaq tarıhyn qazaqtardyń ózi emes, ózgeler jazdy, sondyqtan tarıh betterinde kóptegen jańsaqtyqtarǵa jol berildi». Osy olqylyqtyń ornyn toltyrý maqsatynda Prezıdenttik mádenıet ortalyǵy sońǵy tórt jylda Elbasynyń maquldaýymen «Qazaqstan Respýblıkasy. Táýelsizdik shejiresi» atty dereknamalyq serııalardy jarııalaı bastady.
Kóptomdyqta Qazaqstan Respýblıkasynyń 1991 jylǵy táýelsizdik alǵaly bergi qabyldanǵan resmı qujattary men sheshimderi ret-retimen berilip, «Táýelsizdik shejiresi», «Elmen syrlasý», «Elbasy joldady - eli qoldady», «Álem Qazaqstan týraly», «Álem Prezıdent týraly» degen atpen úzdiksiz jalǵasa beredi.
Bul serııanyń búginde tek 14 tomy ǵana shyqqanymen, qazirgi ýaqytta «Qazaqstan Respýblıkasy memlekettiligi jáne Prezıdenttik ınstıtýtyn zertteý» ǵylymı zerthananyń qyzmetkerleri taǵy 17 tomdy daıyndaý ústinde. 2015 jylǵa qaraı teńdessiz jobanyń 138 tomy jaryqqa shyǵady dep josparlanýda. M. Joldasbekov atalmysh joba eshqashan aıaqtalmaıtyn, únemi úzdiksiz jalǵasa beretin serııa bolatynyna, Qazaqstannyń shynaıy shejiresine, keleshekte óz aldyna derbes kitaphanaǵa aınalatynyna senimdilik bildirdi.
Tusaýkeser rásimine qatysqan Prezıdent Ákimshiligi basshysynyń orynbasary Máýlen Áshimbaev, kóptomdyqtyń taralymyn ulǵaıtý, ondaǵy 1991-1993 jyldardy ǵana qamtyǵan «Elmen syrlasý» kitabyn odan ári jalǵastyrý, ınternet portal quryp kóptomdyqtyń ınternet keńistiginde de taratý jaıynda, sonymen qatar jas urpaqtyń tarıhı sanasyn qalyptastyrý maqsatynda kitaptardy JOO men mektepterde oqytý, serııalardyń negizinde monografılyq eńbekter men ǵylymı zertteýler júrgizý týraly usynystar tastady. Osy ıgi isterdi joǵary deńgeıde aıaqtaý úshin memlekettik komıssııa qurýǵa atsalysatyndyǵyna da ýáde berdi.
