Qazaqstan Respýblıkasy Prezıdentiniń mádenıet ortalyǵy 10 jyldyǵyn atap ótti
ASTANA. 8 Qarasha. QazAqparat /Gúlmıra Álıakparova/ - Búgin keshqurym Astanada QR Prezıdenttik mádenıet ortalyǵynyń qurylǵanyna 10 jyl tolýyna arnalǵan «Rýhanııat ortalyǵy» atty merekelik kesh ótti. Keshke QR Mádenıet mınıstri Muhtar Qul-Muhammed qatysty.
Mınıstr, Ortalyq ujymyn óz atynan quttyqtaı kele, QR Úkimetiniń basshysy Kárim Másimov joldaǵan hatty oqyp berdi. «Mádenı ortalyq qysqa merzimde rýhanııat ordasyna, halqymyzdyń óneri men tarıhyn zerdeleıtin, álemdik mádenıettiń jetistikterin dáripteıtin irgeli ǵylymı shańyraqqa aınaldy. Tarıhymyz ben mádenıetimiz úshin erekshe máni bar murajaı qoryndaǵy qundy jádigerlerdi kóziniń qarashyǵyndaı saqtap, saýapty is atqaryp otyrǵan Ortalyq ujymynyń eńbegi eresen ekendigin aıryqsha atap ótemin. Elimizdiń ultjandy azamattary, zııaly qaýym, órshil jastar bas qosatyn rýhanı ortalyqtyń keregesi keńeıe bersin», -delingen hatta.
Sondaı-aq M.Qul-Muhammed, Mádenı ortalyqtyń 10 jyldyǵyna oraı, onyń eki qyzmetkerine «Mádenıet qaıratkeri» tós belgilerin tabys etti.
Mádenı ordanyń dırektory Myrzataı Joldasbekov atap kórsetkendeı, búginde Ortalyq óz kelýshilerine 5 baǵytta qyzmet kórsetedi. Atap aıtqanda, qoryna 600 myń jádigerdi biriktirgen Qazaqstan Respýblıkasynyń Memlekettik tarıhy murajaıy. Murajaıdyń ózi birneshe bólimnen turady: «Táýelsiz Qazaqstan jáne onyń negizin qalaýshy N.Á.Nazarbaev» zaly, Qasıet zaly, Etnografııa zaly, Arheologııalyq galereıa, «Ejelgi dáýir» zaly, «Qazaq álemi. I.Tasmaǵambetovtyń jeke kollektsııasy», «Tarıhı» galereıa jáne Astananyń búgingisi men ótkeni týraly zal jáne «Kórkemsýret zaly».
M.Joldasbekovtyń aıtýynsha, murajaı ekspozıtsııalaryn 10 jylda 750 myńnan astam adam tamashalaǵan eken. Osy jyldar ishinde qundy jádigerlerdi satyp alýǵa memlekettik qazynadan 205 mln. teńge bólindi. «Ókinishke qaraı»,- deıdi M.Joldasbekov, qarjylandyrý jyldan jylǵa azaıyp, sońǵy eki jylda ol múldem bólinbegen. Biraq murajaı ujymy qarap otyrǵan joq, qoldan kelgen múmkindiktermen, demeýshilerdiń kómegimen tarıhı qundylyqtardy eldiń túkpir-túkpirinen izdep-taýyp jınaqtaýda.
Ortalyq jumysynyń ekinshi baǵyty - Ǵylymı-zertteý zerthanasy. Zerthana sońǵy úsh jylda ǵylymı jumystarmen tyǵyz aınalysa bastap, 2008 jyly «Qazaqstan Respýblıkasy» serııasy boıynsha kóptomdyq dereknamalardy shyǵarýdy qolǵa aldy.
QR Prezıdenttik mádenıet ortalyǵynyń kitaphanasy Astana qalasyndaǵy kitap qoryna baı kitaphanalardyń biri bolyp tabylady. Ondaǵy kitap qorynyń sany - 603 myń dana. Onyń ishinde sırek kitaptar men qoljazbalar qory - 3 myń danany quraıdy.
Elbasynyń tapsyrmasyna sáıkes jáne M.Joldasbekovtyń bas-kóz bolýymen 2006 jyly negizi qalanǵan «Ulttyq dástúrler teatry» búgingi kúni óner súıer qaýymnyń kózaıymyna aınaldy. Teatrdyń alǵashqy shymyldyǵy «Ulbıke» mýzykalyq tragedııalyq qoıylymymen ashyldy.
Sońǵy baǵyty 2002 jyldan beri jaryq kórip kele jatqan - «Mádenı mura» jýrnaly. Eki aıda bir shyǵatyn basylymda «Mádenı mura» memlekettik baǵdarlamasy aıasynda júrgizilip jatqan san-salaly jumystar júıeli túrde jarııalanyp keledi. Onyń redaktory «Parasat» ordeniniń jáne Memlekettik syılyqtyń ıegeri, halyq jazýshysy - Dúkenbaı Dosjan.
M.Joldasbekov atap kórsetkendeı, irgesi qalanǵaly bergi 10 jylda Ortalyq barlyǵy 2 mln.-nan astam kelýshini qarsy alǵan.
Іs-shara «Ulttyq dástúrler teatrynyń» ánshileri men bıshileri ázirlegen merekelik baǵdarlamaǵa ulasty. Sondaı-aq qonaqtardyń nazaryna «Elbasy jáne Elorda» atty kórme usynyldy.
