Qazaqstan Respýblıkasy men Tonga Koroldigi arasynda dıplomatııalyq qatynastar ornatyldy
ASTANA. QazAqparat - Nıý-Iorkte BUU janyndaǵy Qazaqstan Respýblıkasynyń Turaqty ókili Qaırat Ábdirahmanov Tonga Koroldiginiń Turaqty ókili Mahı Týpoıýnııýaeki el arasynda dıplomatııalyq qatynastar ornatý jónindegi birlesken kommıýnıkege qol qoıdy, dep habarlady QR SІM baspasóz qyzmetinen.
Qol qoıý rásimi kezinde ekijaqty deńgeıdegi yntymaqtastyqtyń keleshegi, sondaı-aq, BUU kún tártibiniń eki jaqqa mańyzdy máseleleri talqylandy. Taraptar ózara tıimdi baılanystardy energetıka, mádenıet jáne bilim berý salalary tóńireginde damytý mańyzdylyǵyn moıyndady.
Tonga Koroldiginiń Elshisi Qazaqstannyń BUU-nyń Qaýipsizdik Keńesiniń turaqty emes músheligine 2017-2018 jyldaryna saılaný bastamasyn oń qabyldady. Qazaqstan tarapy aldaǵy VIII Astana ekonomıkalyk forýmyna, Álemdik jáne dástúrli dinder lıderiniń besinshi sezine, sondaı-aq Qazaqstandaǵy eń iri is-sharalardyń biri bolyp sanalatyn Bolashaq energetıkaǵa arnalǵan «EKSPO-2017» kórmesine Tonga Koroldiginiń ókili qatysatynyna úmit bildirdi. Tonga Koroldigi - Tynyq muhıttiń ońtústiginde ornalasqan Polınezııalyq memleket, halqynyń sany 100 000-nan asady, úkimettik bıleý formasy - muragerlik konstıtýtsııalyq monarhııa. Ekonomıkanyń eń mańyzdy salalarynyń biri - aýyl sharýashylyǵy. Memleket azyq-túlik, mashına qurý ónimderi men kólik quraldarynyń, otyn jáne hımııa ónimderiniń ımportyna táýeldi bolyp keledi. Import eksporttan kóp ese artyq. Koroldik - Dúnıejúzilik saýda uıymynyń, Tynyq muhıt qoǵamdastyǵy Hatshylyǵynyń, Tynyq muhıt araldary forýmynyń, Ulttar dostastyǵynyń múshesi.
