Qazaqstan Respýblıkasy Bas prokýratýrasy Instıtýtynda salalyq biliktilikti arttyrý kýrsy ótkiziledi
ASTANA. 8 qazan. QazAqparat - 2012 jyly 9 -12 qazan aralyǵynda Qazaqstan Respýblıkasy Bas prokýratýrasy Instıtýtynda «Sottardyń alqa bıleriniń qatysýymen qylmystyq isterdi qaraýda prokýrorlar qyzmetin jetildirý»
atty taqyrypta sotta memleket múddesine ókildik jasaıtyn oblystyq jáne oǵan teńestirilgen prokýratýralardyń basqarma bastyqtaryna arnalǵan salalyq biliktilikti arttyrý kýrsy ótkiziledi.
Prokýratýra organdarynyń biliktiligin arttyrý kýrsynyń negizgi maqsaty - alqabılerdiń qatysýymen ótken sotta memleket múddesine ókildik jasaýdyń ózekti máselelerin talqylaý bolyp tabylady.
Kýrstyń ashylý saltanatynda Qazaqstan Respýblıkasy Bas prokýratýrasynyń Sot aktileriniń zańdylyǵyna jáne sotta memleket múddesine ókilettik etý departamentiniń bastyǵy B.Shermuhambetov, Bas prokýratýra Instıtýtynyń dırektory S.Tursynbekova qatysady.
Semınarǵa QR Joǵarǵy Sotynyń, Astana qalalyq sotynyń sýdıalary jáne otstavkadaǵy sýdıalar, Bas prokýratýra, Ádilet mınıstrligi, Qarjy polıtsııasy qyzmetkerleri, Din isteri boıynsha agenttik ókilderi men elimizdiń aldyńǵy qatarly joǵarǵy oqý oryndarynyń oqytýshylary men sarapshylary qatysady.
Arnaıy salalyq kýrs baǵdarlamasy alqabılerdiń qatysýymen ótken qylmystyq istiń sotynda memleket múddesine ókildik jasaýdyń, alqabılerdiń qatysýymen sottardyń tájirıbesi, azamattyq-quqyqtyq salada prokýrorlyq esepti qurý máseleleri, kópshilik aldynda sóıleý jáne sheshendik óneri máselelerin, quqyqtyq is júrgizýdiń negizi, terrorızmge jáne ekstremızmge, sybaılas jemqorlyqqa qarsy kúrestiń ózekti máselelerin naqtylaıdy.
Atalǵan semınar aıasynda prokýrorlardyń iskerligi men jumys tıimdiligin arttyrý, júıeli oılaý qabiletin damytý jáne berilgen tapsyrmany tıimdi oryndaýdy damytatyn trenıngter ótkizilip, semınar tyńdaýshylaryna arnaıy nusqadaǵy sertıfıkattar beriledi.
