Qazaqstan Respýblıkasynyń aýmaqtyq tutastyǵy ózgermeıdi — Erlan Qarın

ASTANA. KAZINFORM — Jańa preambýlada memlekettiń shekarasy men aýmaqtyq tutastyǵyna qol suǵylmaıtyny anyq jazylǵan. Bul týraly Konstıtýtsııalyq reforma jónindegi komıssııanyń otyrysynda Memlekettik keńesshi Erlan Qarın málim etti. 

— Konstıtýtsııalyq komıssııa múshesi retinde qoǵamda talqylanyp jatqan birqatar taqyrypqa qatysty óz oıymdy bildirýdi jón sanadym. Birinshiden, «elimizdiń aýmaqtyq tutastyǵyna eshqashan qol suǵylmaıdy jáne ol eshqashan ózgermeıdi». Osylaı taǵy da qaıtalap ótýimiz kerek, sebebi keıbir azamattardyń «Ata Zańda eldiń ákimshilik-aýmaqtyq tutastyǵy ózgeredi» degen pikiri — jalǵan aqparat, — dedi Erlan Qarın.

Osy oraıda ol jańa Konstıtýtsııanyń jobasynda mundaı áreketterge qazir de, bolashaqta da berik tosqaýyl qoıylǵanyn atap ótti.

— Atap aıtqanda, jańa preambýlada memlekettiń shekarasy men aýmaqtyq tutastyǵyna qol suǵylmaıtyny anyq jazylǵan. Sol sekildi 2-baptyń 6-tarmaǵynda «Qazaqstan Respýblıkasynyń aýmaqtyq tutastyǵy ózgermeıdi» dep naqty kórsetilgen. Bul — Qazaqstannyń aýmaqtyq tutastyǵy másele retinde talqylanbaıdy degen sóz. Tipti, referendýmǵa da bolashaqta mundaı máseleler shyǵarylmaıdy degendi bildiredi. Muny búkil el azamattary bilýi kerek, — dedi Erlan Qarın. 

Aıta ketelik Konstıtýtsııalyq reforma jónindegi komıssııanyń jetinshi otyrysy ótip jatyr.