Qazaqstan Reseımen birlese basqarǵan ýran kásipornyn óz baqylaýyna aldy

ASTANA. KAZINFORM – «Samuryq-Qazyna» AQ «Býdenovskoe» birlesken kásipornyn óz baqylaýyna aldy. Bul týraly qordyń KASE-de jarııalaǵan qarjylyq esebinde jazylǵan. 

Qujatta kórsetilgendeı, Jarǵy men Ónimdi bólý týraly kelisimge tıisti ózgerister engizilgen. 2024 jyldyń basynan beri kásiporyndy basqarý aıasyndaǵy negizgi sheshimder kópshilik daýyspen qabyldanyp kelgen. Bul rette qazaqstandyq taraptyń úlesi resmı túrde burynǵydaı — 51% mólsherinde qaldy.

Esepte aktıvke ıelik etý úshin eshqandaı qosymsha qarjy tólenbegeni kórsetilgen. Sonymen qatar, burynǵy ıeliktegi úlesti qaıta baǵalaý nátıjesinde qor 295,7 mlrd teńge somasynda birjolǵy paıda tapqanyn moıyndady, al bul aktsııanyń baqylaýdy alý kezindegi ádil quny 302,9 mlrd teńgeni qurady.

Kásiporynnyń aktıvteri men mindettemelerine táýelsiz baǵalaý júrgizilip, «Býdenovskoe BK» JShS-nyń jalpy ádil quny 707,1 mlrd teńgege deıin ósti. Bul ósimniń basty sebebi — jer qoınaýyn paıdalaný quqyǵyn qaıta baǵalaý boldy.

«Býdenovskoe BK» JShS strategııalyq mańyzy bar aktıv retinde tanyldy. Onda 114 myń tonna ýran qory bar dep baǵalanyp otyr. Bul kórsetkish nysandy osy tektes ken oryndarynyń ishinde aldyńǵy orynǵa shyǵarady.

Aıta keteıik, Qazaqstan men Qytaı Іle oıpatyndaǵy ýran kenishin birlesip barlamaqshy.