Qazaqstan Reseımen aradaǵy shekarany qalypty formatta kúzetedi - UQK

ASTANA. QazAqparat – Ulttyq qaýipsizdik komıteti tóraǵasynyń orynbasary – Shekara qyzmetiniń dırektory Erlan Aldajumanov Senat kýlýarynda memlekettik shekara kúzetiniń basym baǵytyn atady, dep habarlaıdy QazAqparat tilshisi.

«Geosaıası jaǵdaıǵa baılanysty Reseıden aǵylatyn adamdar kóp bolýy múmkin ekeni jıi aıtylady. Osyndaı kezeńde Reseımen shekarany kúsheıtilgen formatta kúzetý qolǵa alyna ma?» - dep surady BAQ ókili.

UQK ókiliniń aıtýynsha, qazir shekara qyzmetiniń basym baǵyty Qyrǵyzstanmen shekara bolyp turǵan kórinedi.

«Geografııalyq turǵydan Reseımen shekaramyz eń uzyny – 7,5 myń shaqyrym. Biz ony negizi qalypty formatta kúzetemiz. Shekara qyzmetiniń fızıkalyq kúshi men qarajaty búkil baǵyttaǵy shekara kúzetin únemi kúsheıtilgen rejımde ustaýǵa múmkindik bere almaıdy. Bizde basym baǵyttar bar. Solardy kúsheıtip ustaımyz. Jaǵdaı týyndap jasta, rezerv bar. Qajetti baǵyttardy sol rezervpen jabamyz», - dedi Erlan Aldajumanov.

Sondaı-aq, ol shekara kúzetiniń basym baǵyty dep kontrabanda táýekeli joǵary tustar týraly aıtyp otyrǵanyn naqtylady.

«Basym baǵyttar memlekettik shekarada bolýy múmkin problamalardan týyndaıdy. Ol shekara buzýshylarmen, kontrabandamen jáne taǵy basqalarmen baılanysty. Qazir qyrǵyz baǵyty basymdyqta. Sondyqtan osy baǵytty kúsheıtip otyrmyz. Biraq búkil baǵytqa rezerv bar», - dedi Shekara qyzmetiniń dırektory.