Qazaqstan reseılik porttardyń retteletin monopolııalar tiziminen shyǵarylýyna qarsy
ASTANA. QazAqparat - QR Taý-ken óndirýshi jáne taý-ken metallýrgııa kásiporyndarynyń respýblıkalyq qaýymdastyǵy Reseı porttaryn retteletin tabıǵı monopolııalar sýbektileri tiziminen shyǵarylýyna qarsylyq bildirdi, dep habarlaıdy QazAqparat.
Qaýymdastyqtyń baspasóz qyzmetiniń atap ótýinshe, Qazaqstannyń kómirin Azııa-Tynyq muhıty óńirindegi memleketterdiń naryǵyna shyǵarýdyń biregeı múmkindigi EAEO elderi úshin temirjol tasymaldaryna arnalǵan tarıfterdi biregeılendirýdi engizýden keıin paıda bolǵan. Osyǵan baılanysty Reseı Úkimeti aǵymdaǵy jyldyń 20 qazanynda qazaqstandyq júkterdi reseılik teńiz porttary arqyly tasymaldaý barysyndaǵy kedergilerdi joıýǵa baǵyttalǵan porttardaǵy tabıǵı monopolııa sýbektileriniń qyzmetterine kemsitilmeıtin ruqsatnama erejesin qabyldaǵan.
Alaıda, reseılik tarap atalǵan erejeni qabyldaǵannan keıin RF Teńiz saýda porttary qaýymdastyǵy porttardy memleket tarapynan retteletin tabıǵı monopolııa sýbektileri tiziminen alyp tastaý týraly usynys jasaǵan.
«Bul durys emes. Óıtkeni, mundaı jaǵdaıda bekitilgen ereje men úkimetaralyq sharttyń portqa esh qatysy bolmaı qalady jáne júrgizilgen barlyq jumystar osyndaı bir sheshim arqyly joıylady. Sol sebepti QR Taý-ken óndirýshi jáne taý-ken metallýrgııa kásiporyndarynyń qaýymdastyǵy Eýrazııalyq ekonomıkalyq komıssııanyń alqasyna qazaqstandyq eksporttyń jolyna jasandy kedergilerdi týyndatatyn mundaı jaǵdaıǵa jol bermeý týraly ótinish jasady», - delingen habarlamada.
