Qazaqstan Reseıge ótken jylǵydan tómen emes kólemde sý aǵyzýdy qamtamasyz etýdi usyndy
ASTANA. KAZINFORM — BQO ákimi Reseı tarapymen sý tasqynyna daıyndyq máselelerin talqylady, dep habarlaıdy oblys ákimdiginiń baspasóz qyzmeti.
Batys Qazaqstan oblysynyń ákimi Narıman Tóreǵalıev Orynbor oblysyna jumys sapary aıasynda Orynbor oblysynyń kóktemgi sý tasqynyn ótkizý jónindegi vedomstvoaralyq komıssııa tóraǵasynyń birinshi orynbasary Andreı Vıazıkovpen kezdesti. Jıynǵa Tótenshe jaǵdaılar departamenti, Sý sharýashylyǵy basqarmasy jáne Rosgıdromet ókilderi de qatysty.
Kezdesýdiń negizgi taqyryby sý tasqyny týraly boljamdar jáne sý tasqyny kezeńinde taraptardyń ózara árekettesýi boldy. Orynbor oblysynyń memlekettik organdarynyń ókilderi oblystaǵy gıdrometeorologııalyq jaǵdaı, kóktemgi sý tasqynyna daıyndyq sharalary jáne basqa da negizgi aspektiler týraly baıandamalar jasady.
— Batys Qazaqstan oblysy úshin eń mańyzdy tabıǵı nysan ári negizgi aýyzsý jáne sý qamtamasyz etý kózi — Jaıyq ózeni basseıni. Onyń boıynda 87 eldi meken ornalasqan, onda oblys halqynyń 75%-yna deıin turady. Sonymen qatar, Jaıyq ózeninen Oral qalasynyń sharýashylyq-aýyz sý qajettilikteri úshin sý alynady, — dedi Narıman Tóreǵalıev.
Ol sondaı-aq boljamdar men sý qoımasynyń kóktemgi sý tasqynyna daıyndyq deńgeıin eskere otyryp, sý qoımasynyń jumys rejımin qalyptasqan gıdrologııalyq jaǵdaıǵa sáıkes retteý qajettigin aıtty. Bul Jaıyq ózeniniń tómengi aǵysyndaǵy sý deńgeıin kópjyldyq ortasha kórsetkishterde ustap turýǵa múmkindik beredi.
Qazaqstandyq tarap sý az bolǵan kezde sýdy aǵyzýdy byltyrǵy kórsetkishterden tómen bolmaý týraly usynys jasady.
Kezdesý nátıjesinde taraptar sý tasqynyna qarsy is-qımyl máseleleri boıynsha tyǵyz yntymaqtastyq, sondaı-aq sý tasqyny áreketiniń barlyq kezeńinde úzdiksiz aqparat almasý týraly kelisimge keldi.
Buǵan deıin Batys Qazaqstan oblysynda azamattyq qorǵaýdyń memlekettik júıesi joǵarǵy daıyndyq rejımine kóshirilgeni málim boldy.