Qazaqstan Reseıge salynýy múmkin ekonomıkalyq sanktsııalardyń túrli stsenarıılerine daıyn - vıtse-premer
ASTANA. QazAqparat - Qazaqstan Reseıge salynýy múmkin sanktsııalardan shyǵýdyń josparyn pysyqtaýda. Bul týraly búgin Ortalyq kommýnıkatsııalar qyzmetinde ótken baspasóz máslıhatynda QR Premer-Mınıstriniń birinshi orynbasary Baqytjan Saǵyntaev málim etti.
«Batystyń Reseıge engizýi múmkin ekonomıkalyq sanktsııalary Qazaqstanǵa qalaı áser etýi yqtımal degen saýaldar bar. Biraq ázirge ol kórinis taýyp otyrǵan joq. Sebebi ol sanktsııalar tek jekelegen adamdarǵa qatysty jasalýda. AQSh, Eýroodaq odan aryǵa barmaýda. Qazirgi kezde olar munaı baǵasyn túsirip tastaýy múmkin degen joramaldar kóp aıtylýda. Ondaı bolsa, Qazaqstan ǵana zardap shekpeıdi, munaı óndirýshi elder kóp. Negizgi oıynshylar bolyp tabylatyn Arab elderi, OPEK ondaıǵa barar aldynda júz ret oılanady», - dedi ol.
Vıtse-premerdiń atap kórsetkenindeı, soǵan qaramastan, Qazaqstan Reseıge salynýy múmkin sanktsııalardan shyǵýdyń josparyn pysyqtaýda.
«Degenmen, biz kez kelgen jaǵdaıǵa, túrli stsenarıılerge daıynbyz. Úkimette biz bos otyrǵan joqpyz, biz de shyn máninde ekonomıkalyq sanktsııalar qabyldanatyn bolsa, odan shyǵýdyń túrli joldaryn jasap jatyrmyz», - dep túıdi oıyn B.Saǵyntaev.
