Qazaqstan Reseıge gýmanıtarlyq kómek jibere me — Resmı jaýap
ASTANA. KAZINFORM — Qazaqstan Reseıden benzın satyp almaıdy jáne jaqyn arada janarmaı tapshylyǵy kútilmeıdi. Energetıka vıtse-mınıstri Qaıyrhan Tutqyshbaev Qazaqstannyń Reseıge gýmanıtarlyq kómek jiberýi jónindegi daqpyrtqa pikir bildirdi.
Úkimette ótken brıfıngte tilshiler «Qazaqstan Reseıge gýmanıtarlyq kómek retinde 50 myń tonna benzın jiberedi» degen aqparattyń ras-ótirigin surady. Sondaı-aq Reseıdegi janarmaı daǵdarysynyń Qazaqstanǵa yqpaly qandaı bolatyny qyzyqtyryp otyr.
— Taǵy da qaıtalap aıtqym keledi: Reseı Federatsııasynan Energetıka mınıstrligine qandaı da bir gýmanıtarlyq kómek kórsetý jóninde resmı ótinish túsken joq. Ózińiz de aıtyp otyrǵandaı, 50 myń tonna — Reseı úshin óte az kólem. Bul aqparat, shamasy, blogerler arasynda taraǵan. Onyń qaıdan shyqqanyn bilmeımin, sondyqtan bul málimetti rastamaımyn, — dedi Q. Tutqyshbaev.
Onyń aıtýynsha, Qazaqstan Reseıden benzın satyp almaıdy. Bul da shyndyqqa janaspaıdy.
— Iá, biz avıatsııalyq kerosın men dızel otynyn ımporttaımyz, biraq benzın ımporttamaımyz. Elimizdegi benzın óndirisi ishki suranysty tolyq qamtamasyz etedi. Qazirgi tańda qajetti janarmaı qory qalyptasqan, otyn teńgerimi saqtalǵan. Sondyqtan qandaı da bir tapshylyq bolady dep kútpeımiz. Blogerler men jekelegen sarapshylardyń pikirine túsinikteme bermeımin. Bizdiń resmı ustanymymyz — osy, — dedi vıtse-mınıstr.
Aıta keteıik, Reseı tarapy Qazaqstannan otyn satyp alý jóninde Energetıka mınıstrligine resmı ótinish joldamaǵanyn jazǵanbyz.
