Qazaqstan Reseıge gaz eksportynyń kólemin ulǵaıtpaq

ASTANA. QazAqparat - Almaty qalasynda ótken «QazMunaıGaz» UK AQ, «Gazprom» AAQ, «Gazprom eksport» JShQ jáne Ulttyq operator «QazTransGaz» AQ arasyndaǵy kelissózderdiń qorytyndysy boıynsha 2018 jylǵy gaz salasyndaǵy yntymaqtastyq máseleleri jónindegi hattama kelisilip, qol qoıyldy, dep habarlaıdy QazAqparat.  

«Qujatqa «QazMunaıGaz» UK AQ gaz tasymaly jáne marketıngi jónindegi atqarýshy vıtse-prezıdenti Qaırat Sháripbaev pen «Gazprom» AAQ Basqarma Tóraǵasynyń orynbasary Aleksandr Medvedev qol qoıdy», dep habarlaıdy «QazTransGaz» AQ-nyń baspasóz qyzmeti.  

Qol jetkizilgen kelisimder gaz tranzıti, óńdeý, ishki naryqta ótkizý, jáne eksport salasyndaǵy seriktestik qarym-qatynastar men yntymaqtastyqty, sonymen qatar, Reseı Federatsııasy baǵytyndaǵy gaz eksportynyń kólemin artyrýdy kózdeıdi.

«Gazprom» AAQ men «QazTransGaz» AQ gaz salasyndaǵy jemisti yntymaqtastyǵy kóp jyldan beri jalǵasyp keledi.

Gaz jáne gazben jabdyqtaý salasyndaǵy ulttyq operator sanalatyn «QazTransGaz» AQ búgingi tańda ishki naryqtyń taýarlyq gazǵa degen qajettiligin tolyǵymen qanaǵattandyrady, jyl saıyn óziniń ekporttyq áleýetin jaqsartyp, Qazaqstan Respýblıkasy arqyly jasalatyn tranzıt kólemin arttyryp keledi.  

Aıta keterligi, «QazTransGaz» AQ Qazaqstan Respýblıkasynyń múddesin otandyq jáne sheteldik gaz naryǵynda qorǵaıtyn negizgi gazenergetıkalyq jáne gaz tasymaldaýshy kompanııa bolyp tabylady. Kompanııa taýarlyq gazdy magıstraldyq jáne gaz taratýshy qubyrlar arqyly tasymaldaıtyn ortalyqtandyrylǵan ınfraqurylymǵa basshylyq jasaıdy, halyqaralyq tranzıtti qamtamasyz etip, ishki jáne syrtqy naryqqa gaz satýmen aınalysady, gaz qubyrlary men gaz saqtaý qoımalarynyń qurylysyn júrgizedi, qarjylandyrady jáne paıdalanady.