Qazaqstan Reseıdiń úsh óńirinde mektep salady - Jumanǵarın
ASTANA.KAZINFORM — Qazaqstan Reseıdiń úsh óńirinde mektep salýdy josparlap otyr. Bul týraly QR Premer-mınıstriniń orynbasary – Ulttyq ekonomıka mınıstri Serik Jumanǵarın málim etti.
Onyń aıtýynsha, Reseı buǵan deıin Qazaqstannyń Túrkistan, Qyzylorda jáne Jambyl oblystarynda úsh mektep salýdy usynǵan.
- Osyǵan sáıkes, biz Orynbor oblysy, Omby jáne Astrahanda mektep qurylysyn usyndyq. Meniń bilýimshe, Orynborda jer telimi bekitilip qoıǵan, al Astrahan men Ombyda jer telimi aıqyndalyp jatyr. Osynyń barlyǵy daıyn bolǵanda, biz oǵan bir ýaqytta qol qoıamyz, - dedi S. Jumanǵarın Joǵary Eýrazııalyq ekonomıkalyq keńes otyrysynyń aldynda tilshiler suraǵyna jaýap bere otyryp.
Premer-mınıstrdiń orynbasary mektepterde aralas oqytý formaty bolatynyn aıtty. Balalar qazaqsha jáne oryssha oqıtyn bolady.
- Bul jospar jaqyn arada júzege asady. Kelisimge qol qoıylǵannan keıin, mektepterdi salamyz. Ony bir jarym jyl ishinde salýǵa bolady, - dedi ol.
Eske salsaq, jaqynda RF Syrtqy ister mınıstri Sergeı Lavrov Reseıde 3 qazaq mektebi ashylatynyn aıtty.
