Qazaqstan Reseıdiń senimdi seriktesi ári odaqtasy bolyp qala beredi – sarapshy

NUR-SULTAN. QazAqparat – Qazaqstan Reseıdiń senimdi seriktesi ári odaqtasy bolyp qala beredi. Mundaı pikirdi QR Prezıdenti janyndaǵy Qazaqstan strategııalyq zertteýler ınstıtýty dırektorynyń orynbasary Sanat Kóshkimbaev aıtty, dep habarlaıdy QazAqparat tilshisi.

Búgin Sputnik Qazaqstan aqparat agenttiginiń Facebook paraqshasynda ótken vıdeokópir barysynda pandemııa kezinde EAES aıasyndaǵy ekonomıkalyq yntymaqtastyqtyń jańa formattary talqylandy.

Talqylaý barysynda Sanat Kóshkimbaev osy jyl Qazaqstan úshin de, Reseı úshin de kúrdeli bolǵanyn atap ótti.

«Elderimizdiń qarym-qatynasynda dınamıkanyń bar ekeni sózsiz. Salalyq mınıstrlikter jáne sarapshylyq deńgeıde qarqyndy saparlardy, baılanystardy baıqap otyrmyz. Qazaqstannyń strategııalyq zertteýler ınstıtýty úshin bul jyl Máskeýde reseılik seriktes-áriptestermen, sarapshylarmen birlesken is-sharamen bastaldy. 2021 jyl kóptegen tosynsyı ákelgeni anyq. Olardyń birazy, qaýipsizdik salasyndaǵy máseleler boljandy da. Bul - kórshilerimizdiń, seriktesterimizdiń aldyndaǵy turǵan mańyzdy syn-tegerýinniń biri», - dep atap ótti sarapshy.

Sonymen qatar ol Qazaqstan men Reseı arasynda mádenıet, ekonomıka, tarıh, qaýipsizdik salasynda tyǵyz baılanys bar ekendigin atap ótti.

«2022 jyldyń 25 mamyrynda Qazaqstan men Reseı arasyndaǵy dostyq, yntymaqtastyq jáne seriktestik týraly shartqa qol qoıylǵanyna 30 jyl tolady. Bul - Táýelsiz Qazaqstannyń bizdiń strategııalyq seriktes ári odaqtasqa aınalǵan elmen qol qoıǵan alǵashqy sharttardyń biri. Bul odaqtastyq áskerı-saıası salada tyǵyz ózara is-qımyldy kózdeıdi. Odan sál burynyraq, 1992 jyldyń 15 mamyrynda eki el ujymdyq qaýipsizdik týraly shartqa qol qoıdy. Bul irgetas 10 jyldan keıin Ujymdyq qaýipsizdik týraly shart uıymynyń qurylýyna negiz boldy. Onda Qazaqstan men Reseı mańyzdy ról atqaryp, bul uıymǵa mańyzdy sıpat beredi», - dedi Sanat Kóshkimbaev.

Spıker bıyl postkeńestik keńistiktegi barlyq el úshin mereıtoılyq jyl sanalatynyn atap ótti.

«Osy turǵydan alǵanda bárimizdiń mártebemiz birdeı, oǵan ártúrli qorytyndymen jettik. Eýrazııalyq keńistiktegi kóshbasshy el retinde Reseı árıne, qorytyndy jasaıdy. Qazaqstan Reseıdiń senimdi seriktesi, odaqtasy bolǵanyn, bolyp qala beretinin bilemiz. Mundaı qoldaýdy Reseı tarapynan da sezinemiz. Bizdiń kóshbasshylarymyz Reseı-Qazaqstan qarym-qatynasy úlgilik sıpatqa ıe ekenin birneshe márte aıtty. Menińshe, osy turǵyda bul - ekijaqty qatynas sıpatynyń keń aýqymdy anyqtamasy», - dedi ınstıtýt dırektorynyń orynbasary.