Qazaqstan Reseıdiń Omby oblysynan mal jáne mal sharýashylyǵy ónimderiniń ákelinýine salynǵan ýaqytsha shekteýlerdi alyp tastady
ASTANA. Qyrkúıektiń 7-si. QazAqparat - Qazaqstan Reseıdiń Omby oblysynan mal jáne mal sharýashylyǵy ónimderiniń ákelinýine salynǵan ýaqytsha shekteýlerdi alyp tastady, dep habarlady búgin Qazaqstannyń Aýyl sharýashylyǵy mınıstrliginen.
Esterińizge sala keteıik, tamyz aıynyń basynda mamandar Reseıdiń Omby oblysyndaǵy Bekıshovo derevnıasynda sibir kúıdirgisiniń oshaǵyn tirkegen bolatyn. Jergilikti turǵyn Ybyraı Áıtenov etke ótkizý úshin óz qorasynda jylqylar soıǵan. Kelesi kúni onyń alty jumysshysy aýrýhanaǵa aýyr jaǵdaıda túsip, bireýi sonda kóz jumady. Zerthanalyq zertteýler olardyń kúıdirgi jarasyn juqtyrǵanyn anyqtaıdy.
Osyǵan oraı, tamyzdyń 6-synan bastap Qazaqstan Reseıdiń Omby oblysynan mal jáne mal sharýashylyǵy ónimderiniń ákelinýine ýaqytsha shekteý engizgen bolatyn. «Rosselhoznadzor» tarabynan kúıdirgi oshaǵy boıynsha jáne aýrýdyń shyǵý sebebi týraly tolyq málimettiń bolmaýyna baılanysty, Qazaqstan taraby osyndaı sheshim qabyldaǵan edi.
Tamyzdyń 26-synda, aýrý maldyń eti Omby oblysynan basqa jaqqa taramaǵany týraly reseılik tarap qajetti kepildeme bergennen keıin, Qazaqstan ýaqytsha shekteýdi alyp tastady, dep habarlady mınıstrliktiń baspasóz qyzmetinen.
