Qazaqstan Reseıden bıyl 150-ge tarta zenıttik zymyran keshenderin alady

ASTANA. QazAqparat - Qazaqstan bıyl Reseıden 150-ge tarta zenıttik zymyran keshenderin alady. Bul týraly búgin Senattyń jalpy otyrysynda QR Qorǵanys mınıstriniń orynbasary Oqas Saparov málim etti.

Eske salaıyq, Parlament Senaty «1995 jylǵy 20 qańtardaǵy Qazaqstan Respýblıkasy men Reseı Federatsııasy arasyndaǵy Reseı Federatsııasy Qorǵanys mınıstrliginiń (obektileri men urys alańdary Qazaqstan Respýblıkasynyń aýmaǵynda ornalasqan) 929 Memlekettik ushý-synaq ortalyǵyn paıdalaný tártibi týraly kelisimge ózgerister men tolyqtyrýlar engizý týraly hattamany ratıfıkatsııalaý týraly» QR Zańy qabyldanǵan bolatyn.

Depýtattar saýalyna jaýap bere kele mınıstrdiń orynbasary Reseı tarapynan Qazaqstanǵa áskerı tehnıkalyq kómekterge de toqtalyp ótti. «Biz byltyrǵy jyly zamanaýı SÝ-30 ushaǵynyń tórt birligin satyp aldyq. Bul TMD aýmaǵyndaǵy ǵana emes, álemdegi eń ozyq tehnıka. BTR-82, S-300 zymyran keshenderiniń bes birligin de byltyr ıelendik. Sonymen qatar bıylǵy jyly da 150-ge tarta zenıttik zymyran keshenderin alatyn bolamyz. Budan bólek, Reseıden qosymsha áskerı tehnıkalardy tegin alyp otyrmyz», dedi O. Saparov.