Qazaqstan Reseıden Baıqońyr aýmaǵyn zańsyz qaldyqtardan tazartýdy talap etti

NUR-SULTAN. QazAqparat – Baıqońyr qalasynyń Reseı Federatsııasyna jalǵa berilgen aýmaqtarynda 1,9 mln tonna zańsyz qurylys qaldyqtary jatyr. Bul týraly Májilis depýtattarynyń saýalyna oraı QR Premer-Mınıstri Asqar Mamınniń jaýabynda aıtylǵan, dep habarlaıdy QazAqparat tilshisi.

«Baıqońyr» kesheniniń 5 alańynda (№9, 9G, 9TZB, 15G jáne 20) ruqsat etilmegen oryndarda ornalasqan qurylys jáne basqa da qaldyqtar Reseı Federatsııasyna jalǵa berilgen jer ýchaskelerinde ornalasqan. 2018 jyly múddeli memlekettik organdar qatarynan (QR EGTRM, Baıqońyr qalasynyń ákimshiligi, Reseı federaldy bıomedıtsınalyq agenttigi) komıssııa quryldy, ruqsat etilmegen qoqys oryndary men jer ýchaskelerin ornalastyrý shemasy jasaldy. Túziletin qaldyqtardyń oryndary, kólemi jáne olardyń morfologııalyq quramy anyqtaldy«,- dedi Premer-Mınıstr.

Onyń aıtýynsha, joǵaryda atalǵan komıssııanyń jumysyn túgendeý aktisine sáıkes Baıqońyr qalasynyń aýmaǵynda ruqsat etilmegen jerlerde ornalasqan qıraǵan ǵımarattar men qurylystardyń jáne basqa da qaldyqtardyń jalpy kólemi 1,9 mln. tonnany quraıdy.

»Ekologııa, geologııa jáne tabıǵı resýrstar mınıstrligi Baıqońyr qalasy Ákimshiliginiń basshysyna qala aýmaǵyn Qazaqstan Respýblıkasynyń ekologııalyq zańnamasynyń talaptaryna sáıkes keltirý jóninde túbegeıli sharalar qabyldaý týraly hat joldady. Qazirgi ýaqytta Ekologııa, geologııa jáne tabıǵı resýrstar mınıstrligi Qyzylorda oblysynyń ákimdigimen birlesip, Reseı tarapymen osy máseleni pysyqtaýdy jalǵastyrýda«, - dedi Asqar Mamın.