Qazaqstan Reseıdegi sý tasqynyn ýshyqtyryp otyr degen málimdeme aqylǵa syıymsyz — mınıstrlik
ASTANA. KAZINFORM — Sý resýrstary jáne ırrıgatsııa mınıstrliginiń resmı ókili Móldir Ábdýalıeva Qazaqstannyń sý qoımalary Reseıdegi sý tasqyny jaǵdaıyna keri áser etip otyr degen málimdemege jaýap berdi.
Munyń aldynda Reseı prezıdentiniń Oral federaldy okrýgindegi ókiletti ókili Vladımır ıAkýshev Qazaqstannyń sý qoımalarynan aǵyzylǵan sý Reseıdiń Qorǵan jáne Tıýmen oblystarynyń alapat tasqynnyń astynda qalýyna alyp kelgen bir faktor degen bolatyn.
Onyń aıtýynsha, Qazaqstannan jiberiletin sý Reseımen aqyldasyp qana iske asýǵa tıis.
«Tobyl ózeniniń boıyndaǵy sý Reseıden keledi. Tıisinshe, sý jiberý týraly sheshim Reseı tarapynan keletin aǵynǵa saı qabyldanady. Sondyqtan Qazaqstan Reseıdegi sý tasqynyna áser etedi dep aıtý durys emes. Bul shyndyqqa janaspaıdy», — deıdi Sý resýrstary jáne ırrıgatsııa mınıstrliginiń resmı ókili Móldir Ábdýalıeva.
Onyń aıtýynsha, 2 sáýirden bastap Qazaqstan jaǵy Reseı tarapyna Tobyl ózeni boıynsha sý ótkizý jónindegi sheshimder týraly aqparat berip otyr.
«Taraptar táýlik boıy sý aǵynynyń ulǵaıýyna nemese azaıýyna qaraı málimet almasady. Sol sebepti kez kelgen kelisilmegen áreket týraly sóz joq. Qazaqstandyq tarap Reseı jaǵymen syılastyq, kórshilik áriptestik rýhynda yntymaqtastyqty ári qaraı jalǵastyrýǵa, aqparat almasýǵa daıyn», — dep túıindedi resmı ókil.
Eske sala keteıik, Reseıdiń Orynbor óńirinde 12 myń úı sý astynda qalyp, 7 myńǵa tarta halyq úıin tastap kóshýge májbúr boldy.
